Փաստ ինֆո

«Հայկական Ժամանակ»-ը զրուցել է սահմանադրական բարեփոխումների մասնագիտական հանձնաժողովի անդամ Գևորգ Դանիելյանի հետ:

Լրատվամիջոցը Գ.Դանիելյանից հետաքրքրվել է, թե ինչպիսի՞ն են Վենետիկի հանձնաժողովի հետ քննարկումների արդյունքները:

Ի պատասխան՝ Գ.Դանիելյանն ասել է, որ Վենետիկի հանձնաժողովն առաջիկա օրերին կներկայացնի պաշտոնական եզրակացությունը:

«Դատելով քննարկումների ընթացքում հնչած հարցադրումներից՝ Վենետիկի հանձնաժողովը ևս ելակետ է ընդունում այն, որ կառավարության ձևի  ընտրությունը բացառապես քաղաքական ուժերի փոխհամաձայնության խնդիր է, առանց որի սահմանադրական բարեփոխումներն ինքնին երաշխավորված չեն, սակայն կոնկրետ ձևի իրացման կառուցակարգային և ընթացակարգային լուծումները զուտ իրավական են և քաղաքական ընտրության դեպքում մենք ձեռնամուխ կլինենք դրան համահունչ և մեր քաղաքական մշակույթին համարժեք լուծումներ առաջադրելուն»,- ասել է Գևորգ Դանիելյանը:

Ինչպես Դանիելյանն է իր խոսքում նշել, առաջարկվել է առանձնահատուկ ուշադրություն դարձնել առանցքային հարաբերությունների կարգավորմանը նվիրված օրենքներին, որոնք կարող են ընդունել բացառապես խորհրդարանի որակյալ մեծամասնությամբ, ինչը ենթադրում է մի կողմից ընդդիմադիր ուժերի քաղաքական դիրքորոշման արժևորում, մյուս կողմից՝ էապես նվազում է հաճախակի սահմանադրական փոփոխությունների դիմելու անհրաժեշտություն:

Թղթակցի այն հարցին, թե Վենետիկի հանձնաժողովն առաջարկում է, որ նախագահն ընտրվի ոչ թե խորհրդարանի կողմից, այլ՝ համաժողովրդական քվեարկությամբ, արդյոք վրացական մոդե՞լն է կիրառվելու, Գևորգ Դանիելյանը պատասխանել է.

«Այս փուլում դեռևս առաջարկվում է վերանայել Հանրապետության Նախագահի ընտրության առնչությամբ դրույթը, սակայն խոսքն ամենևին առաջնային մանդատի մասին չէ, քանի որ կան բազմաթիվ այլ եղանակներ, որոնք երաշխավորում են ողջամիտ ներկայացուցչություն»:

Հոդվածն ամբողջությամբ կարող եք կարդալ «Հայկական Ժամանակ» օրաթերթի` 27.09.2014թ. համարում:

Լուսանկարը՝  Ֆոտոլուրի