Փաստ ինֆո

Արդարադատության նախարարությունում ձևավորված ՄԻԵԴ-ի դատավորի պաշտոնում Հայաստանի Հանրապետության կողմից առաջադրվող թեկնածուների ընտրությունն իրականացնող մրցութային հանձնաժողովը առավելագույնը շուրջ մեկ ամսից պարտավոր է հրապարակել մրցույթում ընդգրկված հավակնորդների անունները:

Նման պահանջ է պարունակում «Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրությունն իրականացնող մրցութային հանձնաժողովի գործունեության և թեկնածուների ընտրության կարգի» մասին ՀՀ նախագահի՝ 2014 թվականի օգոստոսի 2-ի հրամանագիրը:

Հիշեցնենք՝ մրցույթի այս փուլում ԵԴ-ում ՀՀ դատավորի պաշտոնի համար դիմողների անունները գաղտնի են պահվում, քանի որ, ինչպես պարզաբանում են Արդարադատության նախարարությունում, դիմողները չեն ցանկացել բացահայտել իրենց ինքնությունը: Բայց նույնիսկ այս դեպքում, որոշ անուններ մամուլում արդեն շրջանառում են` ՀՀ Գլխավոր դատախազի տեղակալ Էմիլ Բաբայան, նախկին օմբուդսմեն Արմեն Հարությունյան, միջազգային իրավունքի մասնագետ, ԵՊՀ-ի Իրավագիտության ֆակուլտետի Եվրոպական և միջազգային իրավունքի ամբիոնի վարիչ Վիգեն Քոչարյան, ԵԱՀԿ-ում աշխատանքային փորձ ունեցող Դավիթ Հակոբյան, Արդարադատության ակադեմիայի պրոռեկտոր Դավիթ Խաչատուրյան, միջազգային իրավունքի մասնագետ Արա Ղազարյան: Վերջին երկուսն, ի դեպ, «Փաստինֆո»-ի հետ զրույցում հաստատել են, որ դիմել են` մրցույթին մասնակցելու համար:

Ինչևէ, իրականում այս գաղտնի փուլը շատ երկար ձգվել չի կարող:

Բանն այն է, որ, ըստ գործող կարգի, հավակնորդներն իրավունք ունեն շտկելու փաստաթղթերի թերությունները սահմանված ժամկետը լրանալուն հաջորդող երեք օրվա ընթացքում: Իսկ դրանից հետո ևս 2 օրվա ընթացքում, այսինքն` հայտերի ընդունման ժամկետը լրանալուց առավելագույնը 5 օր հետո հանձնաժողովը պետք է կազմի հավակնորդների արդեն վերջնական ցուցակը:

Հիշեցնենք` մրցույթին մասնակցելու հայտերի ընդունման ժամկետը սեպտեմբերի 24-ին` ժամը 18 :00-ին լրանալուց հետո Արդարադատության նախարարությունը տեղեկացրել էր, որ 11 հոգի են դիմել:

Սակայն երեկ դիմումների քանակն ավելացել է ևս 3-ով: Նախարարությունում դա բացատրում են այսպես` «3 թեկնածուների մոտ փաստաթղթերի անճշտություն է եղել, շտկել են և կրկին դիմել»:

Փաստորեն, հոկտեմբերի 1-ի ժամը 18:00-ից սկսած հայտատուների քանակն այլևս ավելանալ չի կարող: Հենց այդ պահին էլ հայտնի կլինի վերջնական ցուցակը: Բայց այն դեռ չի հրապարակվի, քանի որ դրանից հետո էլ դեռ հնարավոր են փոփոխություններ:

Հոկտեմբերի 1-ից սկսած 10-օրյա ժամկետում մեկնարկելու է արդեն մրցույթի առաջին` փաստաթղթերի լրիվության և համապատասխանության ստուգման փուլը, որի ընթացքում ստուգվելու է ներկայացված տեղեկությունների իսկությունը: Կասկածի դեպքում հանձնաժողովը հայտատուին 10 օր ժամանակ կտա` լրացուցիչ տեղեկություններ ներկայացնելու համար: Ուստի` այս փուլը կարող է շուրջ մեկ ամիս ձգվել:

Իսկ արդեն այս փուլը հաղթահարծ թեկնածուների անունները հանձնաժողովը գաղտնի պահել չի կարող:

Ըստ ՀՀ նախագահի հաստատած կարգի` «Փաստաթղթային ստուգման փուլը հաղթահարած թեկնածուների ցուցակը, ինչպես նաև հարցազրույցի անցկացման օրը, ժամը և վայրը հրապարակվում է պաշտոնական կայքերում»:

Դրանից հետո արդեն թեկնածուներին կմնա հաղթահարել հարցազրույցի փուլը, որ դարձյալ բավական երկարատև գործընթաց է. յուրաքանչյուր մասնակից կարող է քննվել առավելագույնը 2 ժամ:

Մրցութային ամբողջ գործընթացը՝ հայտարարության պահից սկսած մինչև նախագահի վավերացում, կարող է տևել առավելագույնը 50 օր:

Իսկ մրցույթի երկու փուլերը հաղթահարած 3 թեկնածուների անունները կներկայացվեն հանրապետության նախագահին:

Ցուցակի հրապարակմանը հաջորդող մեկ օրվա ընթացքում նախագահն այն պետք է հաստատի և արտաքին գործերի նախարարության միջոցով ներկայացնի Եվրոպայի խորհրդի խորհրդարանական վեհաժողովին կամ մերժի:

Եվ այս դեպքում ամեն ինչ կարող է սկսվել նորից: