Փաստ ինֆո

Երևանի տոնավաճառների աշխատողներն այսօր առավոտից դարձյալ կառավարության շենքի դիմաց էին:

Հավաքվածները բողոքում են հոկտեմբերի 1-ից ուժ մեջ մտնող «Շրջանառության հարկի մասին» ՀՀ օրենքի դեմ: Վաճառականները կառավարությունից պահանջում են վերանայել նոր հարկատեսակի կիրառությունը:

Հոկտեմբերի 1-ից գործարկվող օրենքի տրամաբանությունը հետևյալն է. գործարարը պետք է իր ամբողջ ապրանքաշրջանառությունը փաստաթղթավորված տարբերակով ներկայացնի հարկային մարմիններին և փոխարենը վճարի ավելի ցածր հարկ՝ ներկայիս 3.5-ի փոխարեն 1%:

Առևտրականները, սակայն, պնդում են, որ դա հնարավոր չէ անել, քանի որ հաճախ նրանք, ումից իրենք ապրանք են ձեռք բերում, հրաժարվում են գործարքն արձանագրել փաստաթղթերով: Ընդ որում, այս դեպքում խոսքը հատկապես խոշոր բիզնեսի ներկայացուցիչների մասին է:

Կառավարությունն էլ, ի դեպ, չի թաքցնում, որ իրենց նպատակն իսկապես այս ձևով խոշոր բիզնեսին ստվերից դուրս բերելն է:

Կառավարության այսօրվա նիստը սկսվեց հենց այս հարցից:

Վարչապետի առաջարկով՝ Ֆինանսների փոխնախարար Վախթանգ Միրումյանը ներկայացրեց հարցի էությունը:

«Մեզ համար զարմանալի և անհասկանալի է ՓՄՁ-ի անհանգստությունը»,- ասաց փոխնախարարը՝ հավելելով, որ իրենց համոզմամբ՝ ՓՄՁ ներկայացուցիչներն իրականում այս օրենքից անհանգստանալու առիթ չունեն:

Վախթանգ Միրումյանը հիշեցրեց, որ հոկտեմբերի 1-ից ուժի մեջ մտնող օրենքը նախատեսում է հարկային բեռի կտրուկ նվազեցում 3.5-ից մինչև1 %: Իսկ պահանջվող փաստաթղթաշրջանառությունը նպատակ չունի ՓՄՁ-ի մոտ անհարկի ստուգումներ իրականացնելու:

Հակառակը, փոխնախարարի խոսքով՝ կառավարության նպատակը խոշորների նկատմամբ հսկողության ուժեղացումն է:

«Մեր նպատակը ՓՄՁ սուբյեկտները չեն»,- ընդգծեց Վախթանգ Միրումյանը:

Նա նաև իր զարմանքը հայտնեց տոնավաճառների աշխատակիցների բարձրացրած բողոքի վերաբերյալ, «որովհետև նախագիծը շրջանառության փուլում լսումներ է անցել, քննարկումներ են եղել ՀԿ-ների հետ»,- ասաց նա՝ նշելով, որ ՀԿ-ներն ի սկզբանե նախագծի հեղինակների առաջ խնդիր են դրել, ՓՄՁ ներկայացուցիչներին անհարկի միջամտություններից զերծ պահելու:

Ֆինանսների փոխնախարարից հետո հարցի շուրջ իր տեսակետը հայտնեց նաև վարչապետ հովիկ Աբրահամյանը՝ հայտնելով, որ ինքը  երեկ հանդիպել է բողոքող գործարարների հետ:

«Մենք չենք հանդուրժելու, որ իրենք դառնան հարթակ և նպաստեն, որպեսզի խոշորները թաքցնեն հարկերը»,- հայտարարեց վարչապետը և ավելացրեց. «Անհասկանալի է, որ մարդիկ 1%ի փոխարեն ցանկանում են վերադառնալ 3.5%-ի»:

Ի դեպ, այս ելույթների ընթացքում կառավարության շենքի դիմաց բողոքի ակցիան դեռ շարունակվում էր, ելույթներն ուղեկցվում էին կառավարությանն ուղղված «ամոթ» բացականչություններով: