Փաստ ինֆո

2015թ. հուլիսի 1-ին նվազագույն աշխատավարձը Հայաստանում կսահմանվի 55000 դրամ:

«Նվազագույն ամսական աշխատավարձի մասին» Հայաստանի Հանրապետության օրենքում նման փոփոխություն է առաջարկում ՀՀ կառավարությունը:

Այս առաջարկը գործադիրն այսօր արդեն հաստատել է ևառաջիկայում կներկայացնի ԱԺ-ի հաստատմանը:

Հիշեցնենք՝ ՀՀ Կառավարության ռազմավարական ծրագրերով նախատեսված է նվազագույն աշխատավարձի աստիճանական բարձրացում:

Սակայն համաշխարհային ֆինանսատնտեսական ճգնաժամով պայմանավորված`  2009-2011 թվականներին նվազագույն աշխատավարձը ոչ մի դրամով չբարձրացավ: 2009թ. սահմանված 30 000 դրամը ընդամենը 2500 դրամով բարձրացավ, միայն 2011թ.-ին` հասնելով 32 500 դրամի: Այս չափը պահպանվեց նաև 2012 թվականին:

Իսկ 2014թ. հուլիսի 1-ից նվազագույն աշխատավարձը Հայաստանում սահմանվեց 50 000 դրամ, որին էլ հաջորդ տարի կառավարությունն առաջարկում է ավելացնելևս 5000 դրամ:

Գործադիրն, ի դեպ, իր որոշման «հիմնավորում» հատվածում ընդունում է, որ այս գումարը չի կարող ապահովել մարդու նվազագույն կենսապայմանները:

«Հանդիսանալով ՀՀ աշխատաշուկայի կարգավորման հիմնական գործիքներից մեկը` գործող նվազագույն աշխատավարձը ձևավորում է աշխատուժի ցածր գին (աշխատավարձ), որը ցածր է նաև աշխատողի վերարտադրության համար անհրաժեշտ ծախսերի արժեքից և դեռևս չի ապահովում աշխատողի նվազագույն կենսապայմանները»,- ասված է որոշման նախագծում: Բայցևայնպես, կառավարությունն իր քաղաքացիներին հորդորում է դիմանալ ու սպասել ավելի լավ օրերի:

«Նվազագույն աշխատավարձն աշխատողի վերարտադրության համար անհրաժեշտ ծախսերին հավասարեցնելու անհրաժեշտությունը, ինչպես նաև նվազագույն աշխատավարձի և միջին աշխատավարձի միջև առկա տարբերության կրճատումը պահանջում են նվազագույն աշխատավարձի աստիճանական բարձրացում` ՀՀ սոցիալ-տնտեսական զարգացման ներկա փուլում»,- ասված է այսօր ընդունված և ԱԺ ուղարկված «Նվազագույն ամսական աշխատավարձի մասին» Հայաստանի Հանրապետության օրենքում փոփոխություններ կատարելու մասին» օրենքի նախագծում: