Փաստ ինֆո

ՀՀ կառավարությունն այսօր հաստատեց «Հայաստանի Հանրապետության քննչական կոմիտեի դեպարտամենտ» պետական կառավարչական հիմնարկի կանոնադրությունը և քննչական կոմիտեի ծառայողների պարտադիր պետական ապահովագրության և ապահովագրական գումարների չափերը, հաշվարկման, վճարման կարգն ու պայմանները սահմանելու մասին նախագծերը:

Քննչական կոմիտեում մշակված Կանոնադրությունը գործադրի նիստում ներկայացրեց Արդարադատության նախարար Հովհաննես Մանուկյանը` իր խոսքում նշելով, որ «դեպարտամենտն իրավաբանական անձի կարգավիճակ չունեցող պետական կառավարչական հիմնարկ է, որն ապահովում է Քննչական կոմիտեին ՀՀ օրենքով վերապահված լիազորությունների լիարժեք ու արդյունավետ իրականացումը և քաղաքացիական իրավահարաբերություններին նրա մասնակցությունը»:

Դեպարտամենտի կանոնադրությունը սահմանում է քննչական կոմիտեի և կոմիտեի դեպարտամենտի կառուցվածքը, գործառույթներն ու պարտականությունները:

«Դեպարտամնետը կառավարում է ՀՀ քննչական կոմիտեի նախագահը: Դեպարտամենտը ենթակա և հաշվետու է ՀՀ քննչական կոմիտեի նախագահին»,- սահմանում է կանոնադրությունը՝ միաժամանակ կանոնակարգելով նաև 2 կառույցների իրավահարաբերություններն ու լիազորությունները:

Այսպես, օրինակ, դեպարտամենտի ղեկավարին նշանակում և ազատում է Կոմիտեի նախագահը: Նա է իրավասու նաև իր կողմից նշանակված ղեկավարի նկատմամբ խրախուսանքի միջոցներ և կարգապահական տույժեր կիրառելու: Կոմիտեի նախագահը կարող է նաև կասեցնել կամ ուժը կորցրած ճանաչել դեպարտամենտի ղեկավարի` իրավական ակտերի պահանջներին հակասող որոշումները, հրամանները կամ իրավական այլ ակտերը:

Կոմիտեի նախագահն է սահմանում նաև պետական ծառայության թափուր պաշտոնների զբաղեցման համար մրցութային հանձնաժողովի կազմը և աշխատակարգը, պետական ծառայության թափուր պաշտոններ զբաղեցնելու համար փակ մրցույթի անցկացման, թեստավորման, բաց մրցույթի հարցազրույցի անցկացման և գնահատման կարգը:

Կոմիտեի նախագահը կարող է նաև անհրաժեշտության դեպքում քննչական դեպարտամենտում  ծառայողական քննություն նշանակել և հաստատել դրա անցկացման կարգը:

Կոմիտեի նախագահը, ըստ կանոնադրության, ունի խորհրդական և մամուլի քարտուղար, որոնց պաշտոնի է նշանակում և ազատում է ինքը: Նրա հրամանով են նշանակում եւ ազատում նաև կոմիտեի նախագահի տեղակալների օգնականները` նրանց անմիջական ղեկավարների` Կոմիտեի նախագահի տեղակալների ներկայացմամբ:  

Ինչ վերաբերում է ՀՀ Քննչական կոմիտեի դեպարտամենտի ղեկավարին, ապա ներկայացված կանոնադրության համաձայն՝ նա պետական ծառայող է, որին պաշտոնի նշանակում է կոմիտեի նախագահը՝ հինգ տարի ժամկետով:

Դեպարտամենտի ղեկավարը ենթակա և հաշվետու է միայն կոմիտեի նախագահին, տնօրինում է դեպարտամենտին ամրացված պետական գույքը, ֆինանսական միջոցները, ապահովում է դեպարտամենտի կապը ՀՀ պետական կառավարման և տեղական ինքնակառավարման ու այլ մարմինների հետ:

Դեպարտամենտի ղեկավարն է պատասխանատու կոմիտեի և դեպարտամենտի ֆինանսական պարտավորությունները և հիմնական միջոցներն արդյունավետ կառավարելու, ինչպես նաև՝ նյութական և ֆինանսական միջոցների վատնումն ու չնախատեսված ծախսերը կանխելու, արդյունավետ օգտագործելու համար:

Դեպարտամենտի ղեկավարը նույնպես ունի տեղակալներ, որոնք նույնպես պետական ծառայողներ են, որոնց պաշտոնի է նշանակում և ազատում կոմիտեի նախագահը՝ դեպարտամենտի ղեկավարի ներկայացմամբ:

Կանոնադրությունը նաև սահմանում է կոմիտեի և դեպարտամենտի կառուցվածքային ստորաբաժանումները, դրանց գործառույթները:
ՀՀ կառավարության մեկ այլ որոշմամբ՝ այսօր հաստատվեց նաև կոմիտեի ծառայողների պարտադիր պետական ապահովագրությանը վերաբերող նախագիծը: Դրանով սահմանվում է ծառայողական պարտականությունները կատարելու ընթացքում հաշմանդամ ճանաչվելու և առողջությանը վնաս պատճառվելու դեպքերում քննչական կոմիտեի ծառայողին պետական պարտադիր ապահովագրական միանվագ գումար վճարելու կարգը:

Ըստ այդ որոշման՝ աշխատանքի ընթացքում հաշմանդամ դարձած աշխատակիցների համար նախատեսվում են  հետևյալ ապահովագրական վճարեր` առաջին խմբի հաշմանդամին և առողջությանը վնաս պատճառված անձին՝ 455 000 դրամի չափով, երկրորդ խմբի հաշմանդամին՝ այդ գումարի 80 տոկոսի չափով, երրորդ խմբի հաշմանդամին՝ 60 տոկոսի չափով։

Ներկայացված նախագծերը կառավարությունն ընդունեց առանց հավելյալ քննարկումների: Դրանք ուժի մեջեն մտնելու հրապարակման պահից: