Փաստ ինֆո

ՀՀ արդարադատության նախարարությունում տեղի է ունեցել «Աջակցություն Հայաստանում արդարադատության ոլորտի բարեփոխումներին - երկրորդ փուլ» ծրագրի Վերահսկող կոմիտեի նիստը, որը նախագահել է ՀՀ արդարադատության նախարար Հովհաննես Մանուկյանը: Այս մասին տեղեկացնում է ՀՀ ԱՆ տեղեկատվության եւ հասարակայնության հետ կապերի բաժինը:

Նիստին մասնակցել են ՀՀ-ում ԵՄ պատվիրակության ղեկավար, դեսպան Տրայան Հրիսթեան, ինչպես նաեւ՝ ՀՀ արդարադատության, Էկոնոմիկայի եւ Ֆինանսների նախարարությունների, Արդարադատության խորհրդի, Գլխավոր դատախազության, Վճռաբեկ դատարանի, Փաստաբանների պալատի եւ քաղաքացիական հասարակության ներկայացուցիչներ:

Նախարարը, ողջունելով մասնակիցներին, ներկայացրել է «Աջակցություն Հայաստանում արդարադատության ոլորտի բարեփոխումներին–երկրորդ փուլ» ծրագրի իրականացման աշխատանքները:

«Հայաստան-Եվրոպական Միության համագործակցության ձեւաչափում շատ կարեւոր է «Աջակցություն Հայաստանում արդարադատության ոլորտի բարեփոխումներին – երկրորդ փուլ» ծրագիրը, քանի որ այն ԵՄ- Հայաստան հարաբերությունների զարգացման ինքնատիպ գործիք է»,-նշել է նախարարը:

Նրա խոսքով՝ այս համաձայնագիրի շնորհիվ ՝ հնարավոր կլինի ունենալ էական շարունակական բարեփոխումներ եւ զգալի արդյունքներ Հայաստանի համար առանցքային հինգ ոլորտներում` անկախ,  թափանցիկ եւ հաշվետու արդարադատություն, արդյունավետ եւ հասանելի արդարադատության համակարգ քրեական օրենսգրքի եւ այլընտրանքային պատժի համակարգերի վերանայում, հանրությանը տրամադրվող ծառայությունների որակ, քրեակատարողական համակարգի բարեփոխում:

Հովհաննես Մանուկյանը ներկայացրել է նաեւ դատական համակարգին առնչվող ձեռքբերումները՝ ընդգծելով դատական ինքնակառավարման մարմիններին վերապահված դերի, դատավորների թեստավորման ու նշանակման, նրանց գնահատման ու առաջխաղացման, առավել արդյունավետ քաղաքացիական կացության ակտերի գրանցման ոլորտներում իրականացվող բարեփոխումները:

«Այս բոլոր թիրախային ոլորտներում կատարվելիք փոփոխություններն ուղղված են ժողովրդավարության, իրավունքի գերակայության եւ մարդու իրավունքների արդյունավետ պաշտպանության երկարատեւ գործընթացի ապահովմանը:»,-ասել է նախարարը՝ մաղթելով բոլորին արդյունավետ աշխատանք:

ՀՀ-ում ԵՄ պատվիրակության ղեկավար, դեսպան Տրայան Հրիսթեան կարեւորել է համագործակցային այս մակարդակը՝ շեշտելով, որ այն ուղղված է արդարադատության ոլորտում որակական առաջընթաց ապահովելուն, ինչպես նաեւ քաղաքացիական հասարակությանը պետական կառավարման ոլորտի աշխատանքներին մասնակից դարձնելուն: Դեսպանը ներկայացրել է ծրագրի շրջանակներում կատարած աշխատանքները՝ նշելով, որ կան լուրջ ձեռքբերումներ:

«Ստեղծվել է փաստաբանների դպրոցը, դատավորների ընտրության ընթացակարգում ներդրվել է պատահական ընտրության կարգը, ընդլայնվել եւ բարելավվել է անվճար իրավաբանական ծառայության մատուցման որակը, կառուցվել է երկու եւ վերակառուցվել յոթ դատարանի շենք, ինչպես նաեւ՝ քաղաքացիների տեղեկացվածության մակարդակը բարձրացնելու նպատակով տեղակայվել է քսանվեց տեղեկատվական տերմինալ»,-հավելել է դեսպանը:

Ըստ նրա՝ այժմ աջակցությունը լինելու է անկախ, թափանցիկ եւ հաշվետվական դատական համակարգ, արդյունավետ եւ թափանցիկ արդարադատություն, մատուցվող ծառայությունների բարձր որակ, քրեակատարողական ոլորտի բարեփոխումներ ապահովելու
ուղղություններով:

Արդարադատության նախարարի տեղակալ Արտյոմ Գեղամյանը ներկայացրել է Ծրագրի երկրորդ փուլի մանրամասները՝ խոսելով դրա շրջանակներում ընդգրկված թիրախային ոլորտների, նպատակների եւ սկզբունքների մասին: Նա անդրադարձել է դատավորների վարքագծի նոր պարզեցված կանոնակարգի ընդունման հարցերին, դատավորների գնահատման չափանիշներին, վիճակագրության վարելու գործընթացի եւ էլեկտրոնային համակարգի ներդրման հիմնախնդիրներին:

Արդարադատության նախարարի տեղակալ Սուրեն Քրմոյանը ներկայացրել է քաղաքացիական կացության ակտերի գրանցման ոլորտի բարեփոխումների ներկա վիճակը: Խոսելով ոլորտում ներդրված էլեկտրոնային կառավարման համակարգի մասին, նշել է, որ այն ապահովել է որակական լուրջ աճ: «Ներկայում աշխատանքները իրականացվում են շատ կարճ ժամանակում եւ մաքսիմալ արդյունավետ,
այնուամենայնիվ մենք շարունակական բարելավում ենք ապահովվելու», -հավաստիացրել է Սուրեն Քրմոյանը:

Հարցուպատասխանի ժամանակ իրավապաշտպաններից մեկը հետաքրքրվել է, այս բարեփոխումների գործընթացին քաղաքացիական հասարակության մասնակցության մեխաբնիզմներից:

Նախարարը պատասխանել է, որ կառավարությունն իր առջեւ նպատակ է դրել հանրային սեկտորին հնարավորինս մասնակից դարձնել պետական կառավարման ոլորտին առնչվող որոշումների ընդունման գործընթացին: «Բայց, նախ, պետք է հասարակությանը ինֆորմացիա տանք, որպեսզի այն ավելի արդյունավետ կարողանա ապահովել իր մասնակցությունը՝ թե պետության, թե քաղաքացիական հասարակության շահերի իրացման համար՝ հանուն համընդհանուր շահերի ու նպատակների», հավելել է նախարարը:

Ամփոփելով նիստում հնչած կարծիքները՝ նախարարը հույս է հայտնել, որ այս համագործակցությունը կշարունակվի՝ կարեւորելով դատական եւ իրավական բարեփոխումները, որոնք նոր որակ կհաղորդեն մարդու իրավունքների պաշտպանությանը: «Մենք շահագրգիռ ենք, որպեսզի այս ողջ գործընթացում ապահովվի քաղաքացիական հասարակության ակտիվ մասնակցությունը»,-եզրափակել է Հովհաննես Մանուկյանը: