Փաստ ինֆո

ՀՀ կառավարության վաղվա նիստի օրակարգում դարձյալ ներառվել են ՀՀ քննչական կոմիտեի գործունեությանը վերաբերող հարցեր:

Գործադրի հաստատմանն են ներկայացվել «Հայաստանի Հանրապետության քննչական կոմիտեի դեպարտամենտ» պետական կառավարչական հիմնարկի կանոնադրությունը և քննչական կոմիտեի ծառայողների պարտադիր պետական ապահովագրության և ապահովագրական գումարների չափերը, հաշվարկման, վճարման կարգն ու պայմանները սահմանելու մասին նախագիծը:

Ներկայացված կանոնադրությունը, որ Արդարադատության նախարարության միջոցով, ներառվել է օրակարգում, կազմվել է հենց Քննչական կոմիտեում: Այն սահմանում է քննչական կոմիտեի և կոմիտեի դեպարտամենտի կառուցվածքը, գործառույթներն ու պարտականությունները:

Այսպես, օրինակ, սահմանվում է, որ «Դեպարտամենտը կառավարում է ՀՀ քննչական կոմիտեի նախագահը: Դեպարտամենտը ենթակա և հաշվետու է ՀՀ քննչական կոմիտեի նախագահին»:

Դեպարտամենտի ղեկավարին նշանակում և ազատում է Կոմիտեի նախագահը: Նա է իրավասու նաև իր կողմից նշանակված ղեկավարի նկատմամբ խրախուսանքի միջոցներ և կարգապահական տույժեր կիրառելու: Կոմիտեի նախագահը կարող է նաև կասեցնել կամ ուժը կորցրած է ճանաչել դեպարտամենտի ղեկավարի` իրավական ակտերի պահանջներին հակասող որոշումները, հրամանները կամ իրավական այլ ակտերը:

Կոմիտեի նախագահն է սահմանում նաև պետական ծառայության թափուր պաշտոնների զբաղեցման համար մրցութային հանձնաժողովի կազմը և աշխատակարգը, պետական ծառայության թափուր պաշտոններ զբաղեցնելու համար փակ մրցույթի անցկացման, թեստավորման, բաց մրցույթի հարցազրույցի անցկացման և գնահատման կարգը:

Կոմիտեի նախագահը կարող է նաև անհրաժեշտության դեպքում քննչական դեպարտամենտում  ծառայողական քննություն նշանակել և հաստատել դրա անցկացման կարգը:

Կոմիտեի նախագահը, ըստ կանոնադրության, ունի խորհրդական և մամուլի քարտուղար, որոնց պաշտոնի է նշանակում և ազատում է կոմիտեի նախագահը: Նրա հրամանով են նշանակում եւ ազատում նաև կոմիտեի նախագահի տեղակալների օգնականները` նրանց անմիջական ղեկավարների` Կոմիտեի նախագահի տեղակալների ներկայացմամբ:  

Ինչ վերաբերում է ՀՀ Քննչական կոմիտեի դեպարտամենտի ղեկավարին, ապա ներկայացված կանոնադրության համաձայն՝ նա պետական ծառայող է, որին պաշտոնի նշանակում է կոմիտեի նախագահը՝ հինգ տարի ժամկետով:

Դեպարտամենտի ղեկավարը ենթակա և հաշվետու է միայն կոմիտեի նախագահին, տնօրինում է դեպարտամենտին ամրացված պետական գույքը, ֆինանսական միջոցները, ապահովում է դեպարտամենտի կապը ՀՀ պետական կառավարման և տեղական ինքնակառավարման ու այլ մարմինների հետ:

Դեպարտամենտի ղեկավարն է պատասխանատու կոմիտեի և դեպարտամենտի ֆինանսական պարտավորությունները և հիմնական միջոցներն արդյունավետ կառավարելու, ինչպես նաև՝ նյութական և ֆինանսական միջոցների վատնումն ու չնախատեսված ծախսերը կանխելու, արդյունավետ օգտագործելու համար:

Դեպարտամենտի ղեկավարը նույնպես ունի տեղակալներ, որոնք նույնպես պետական ծառայողներ են, որոնց պաշտոնի է նշանակում և ազատում կոմիտեի նախագահը՝ դեպարտամենտի ղեկավարի ներկայացմամբ:

Կանոնադրությունը նաև սահմանում է կոմիտեի և դեպարտամենտի կառուցվածքային ստորաբաժանումները, դրանց գործառույթները:

ՀՀ քննչական կոմիտեի վերաբերյալ ՀՀ կառավարության նիստի օրակարգում ընդգրկված հաջորդ հարցը վերաբերում է կոմիտեի ծառայողների պարտադիր պետական ապահովագրությանը:

Այդ նախագծով սահմանվում է ծառայողական պարտականությունները կատարելու ընթացքում հաշմանդամ ճանաչվելու և առողջությանը վնաս պատճառվելու դեպքերում քննչական կոմիտեի ծառայողին պետական պարտադիր ապահովագրական միանվագ գումար վճարելու կարգը:

Նախատեսվում է աշխատանքի ընթացքում հաշմանդամ դարձած աշխատակիցների տրամադրել հետևյալ ապահովագրական վճարերը` առաջին խմբի հաշմանդամին և առողջությանը վնաս պատճառված անձին՝ 455 000 դրամի չափով, երկրորդ խմբի հաշմանդամին՝ այդ գումարի 80 տոկոսի չափով, երրորդ խմբի հաշմանդամին՝ 60 տոկոսի չափով։