Փաստ ինֆո

Բանդայի գործով այսօրվա դատական նիստում դատարանը որոշեց դատարան հրավիրել ու  հարցաքննել զենքերի մատնադրոշմային փորձաքննությունը կատարած փորձագետին:

Դատարանն այսպիսով բավարարեց պաշտպանական կողմի միջնորդությունը:

Իսկ մատնադրոշմային փորձաքննության եզրակացությունը անթույլատրելի ճանաչելու մասին պաշտպանական կողմի մեկ այլ միջնորդությանը դատարանը կանդրադառնա փորձագետին հարցաքննելուց հետո:  

Դատարանը մերժեց ամբաստանյալ Սամվել Դավթյանի պաշտպան Կարեն Հակոբյանի միջնորդությունը իր պաշտպանյալին կրկնակի դատաբժշկական փորձաքննության ենթարկելու մասին: Ըստ պաշտպանի՝ գործում առկա դատաբժշկական փորձաքննության մեջ չեն արտացոլվել ամբաստանյալի կողոսկրերի կոտրվածքները:

Այսօրվա դատական նիստում մեղադրող Սասուն Խաչատրյանը հրապարակեց գործով բոլոր 4 ամբաստանյալների՝ Արտուշ Հակոբյանի, Դավիթ Գալստյանի, Սամվել Դավթյանի ու Արթուր Մանուկյանի վերաբերյալ նախկինում կայացված դատական ակտերը:

Արտուշ Հակոբյանի պաշտպան Հովիկ Արսենյանը, մասնավորապես, արձանագրեց, որ ավազակային հարձակումների վերաբերյալ մեղադրանքում իր պաշտպանյալն արդարացվել է, նա մեղավոր է ճանաչվել փաստաթուղթ՝ անձնագիր, կեղծելու ու ապօրինի պետական սահմանը հատելու մեջ, և «դա ալիբի է»:  
 
Մեղադրողն իր հերթին արձանագրեց, որ նախկին մի գործով կայացված դատական ակտի համաձայն՝ ամբաստանյալ Դավիթ Գալստյանը բնակարաններ մուտք է գործել պտուտակահանի գործադրմամբ. այն, ըստ էության, նույն եղանակն է, ինչ ներկայումս քննարկվող դեպքերում:

Ամբաստանյալ Սամվել Դավթյանի վերաբերյալ նախկինում կայացված դատական ակտի համաձայն՝ Գուրգեն Հայրապետյանի կողմից ստեղծված զինված բանդայի կազմում նա Երևանում մասնակցել է զինված ավազակային հարձակումների:

Ի դեպ, բանդայի ներկայիս գործով նույնպես հետմահու շոշափվում է Գուրգեն Հայրապետյանի անունը: Ըստ մեղադրական եզրակացության՝ Արտուշ Հակոբյանը Գուրգեն Հայրապետյանի հետ միասին (վերջինս, փորձելով ազատվել ոստիկանության աշխատակիցների հետապնդումներից, դիմել էր փախուստի, որի ընթացքում, բարձրանալով Մյասնիկյան պողոտային հարակից ժայռի վրա, վայր է ընկել և մահացել) ստեղծել և ղեկավարել է կազմակերպված, զինված կայուն խումբ` բանդա:

Արտուշ Հակոբյանի պաշտպան Հովիկ Արսենյանը, հիշատակելով Գուրգեն Հայրապետյանի դեմ գործով դատական ակտը, ըստ որի՝ նա 1992-93թթ. խմբի կազմում Երևանում ավազակային հարձակումներ է կատարել, ընդգծեց, որ դրան Արտուշ Հակոբյանը որևէ կերպ չի առնչվում, սակայն բանդայի գործով հանկարծ նրան բերել ու կցել են Գուրգեն Հայրապետյանին:

Իսկ ամբաստանյալ Արթուր Մանուկյանը նախկինում քննված գործով չի դատվել, որովհետև ճանաչվել է անմեղսունակ, և նա հարկադիր բուժման է ուղարկվել:
     
Դատարանում այսօր հրապարակվեցին Արտուշ Հակոբյանի երկու հեռախոսահամարների ելքային-մուտքային զանգերի վերծանումները:

Ըստ այդմ, մասնավորապես, հեռախոսահամարներից մեկին, որը գրանցված չէ որևէ մեկի անունով, ԱԺ նախկին պատգամավոր Նապոլեոն Ազիզյանի տան վրա ավազակային հարձակման առավոտյան (հարձակումը տեղի է ունեցել ժամը 03:00-05:00-ն)  02:54-ին և  11:43-ին  ելքային զանգեր են եղել հիշյալ հեռախոսահամարից, իսկ հիշյալ երկու զանգերի միջակայքում հեռախոսը չի սպասարկվել որևէ կայանի կողմից: