Փաստ ինֆո

Սույն թվականի սեպտեմբերի 23-ին ՀՀ պաշտպանության նախարարությունում անցկացվեց ՀՀ Նախագահի կարգադրությամբ ձեւավորված Հայաստանի Հանրապետության պաշտպանության ռազմավարական հերթական վերանայման գործընթացը համակարգող միջգերատեսչական հանձնաժողովի հերթական նիստը: Այս մասին տեղեկացնում է ՊՆ տեղեկատվության և հասարակայնության հետ կապերի վարչությունը:

ՀՀ պաշտպանության նախարար Սեյրան Օհանյանի նախագությամբ անցկացված նիստին մասնակցում էին ռազմավարական վերանայման գործընթացին ներգրավված պետական կառավարման բոլոր մարմինները` նախարարների տեղակալների մակարդակով, ինչպես նաեւ պաշտպանության նախարարության եւ զինված ուժերի բարձրաստիճան պաշտոնյաները:

Միջգերատեսչական հանձնաժողովի նիստի ընթացքում ամփոփվեցին վերանայման գործընթացի երկրորդ փուլի արդյունքները եւ համաձայնեցվեցին Հայաստանի Հանրապետության պաշտպանության ռազմավարական պլանավորման նկատառումները:

Պլանավորման նկատառումներում մատնանշվել են պետության զինված պաշտպանության կազմակերպման այնպիսի նոր գաղափարներ ու մոտեցումներ, ինչպիսիք են «Խելամիտ պաշտպանությունը» եւ «Առաջադրանքով հրամանատրումը»: Հայաստանի Հանրապետության զինված ուժերում այս եւ այլ նորարարական լուծումների կյանքի կոչումը թույլ կտա փոքր ուժերով մեծ խնդիրների կատարմանն ունակ ստորաբաժանումների միջոցով վարել տարատեղված եւ ապակենտրոնացված գործողություններ:

ՀՀ պաշտպանության նախարարության համար վճռական մոտեցումների եւս մեկ կարեւոր ուղղություն է լինելու զինվորական էթիկայի նորմերի, կառավարման մշակույթի զարգացումը եւ բարեվարքության ամրապնդումը: Այս նախաձեռնություններն ուղղված կլինեն զինված ուժերում բարեփոխումների տեսլականը զինվորական ծառայության նկատմամբ վերաբերմունքի փոփոխության եւ զինվորականների սոցիալական խմբերում փոխհարաբերությունների նոր մոդելների վրա խարսխելուն:

Նիստի ավարտին ազդարարվեց Պաշտպանության ռազմավարական վերանայման գործընթացի 3-րդ փուլի մեկնարկը, որի ընթացքում մշակվելու եւ սահմանվելու են պաշտպանության գործում շահառու մարմինների դերերն ու առաջադրանքները եւ զինված ուժերի խնդիրները:

Ամփոփելով նիստի արդյունքները, պաշտպանության նախարար Սեյրան Օհանյանը բոլոր գերատեսչություններին շնորհակալություն հայտնեց համապետական նշանակության այս ձեռնարկում ցուցաբերած ակտիվ մասնակցության համար, վստահություն հայտնելով որ միջգերատեսչական փոխգործակցության նույն բարձր մակարդակը կպահպանվի նաեւ ռազմավարական վերանայման հաջորդիվ փուլերի ընթացքում:

Պաշտպանության ռազմավարական երկրորդ վերանայումը կիրականացվի մինչեւ 2015թ. ավարտը եւ նպատակաուղղված կլինի Հայաստանի շուրջ ձեւավորված անվտանգության միջավայրի երկարաժամկետ գնահատման հիման վրա պաշտպանության եւ անվտանգային դինամիկ համակարգի` մինչեւ 2020թ. հեռանկարային զարգացման երաշխավորմանը: