Փաստ ինֆո

ՀՔԾ-ում ավարտվել է ցուցմունքներ տալուց հրաժարվելու փաստի առթիվ հարուցված քրեական գործի նախաքննությունը: Այս մասին տեղեկանում ենք ՀՔԾ պաշտոնական կայք-էջից:

Նախաքննությամբ հիմնավորվել է, որ 2014թ. մայիսի 21-ին Մալխաս Ասատրյանը Շիրակի մարզի դատախազությունում հաղորդում է տվել այն մասին, որ 2014թ. ապրիլի 28-ի լույս 29-ի գիշերն անհայտ անձինք ապօրինի մուտք են գործել Գյումրի քաղաքի Գ.Նժդեհի փողոցի՝ իր բնակարանը և հափշտակել կենցաղային տարբեր տեսակի իրեր:

Կատարված հանցագործության մասին Մալխաս Ասատրյանը ցանկացել է հաղորդում տալ ՀՀ ոստիկանության Շիրակի մարզային վարչության Գյումրի քաղաքի Կումայրիի բաժնում, սակայն օրվա օպերատիվ հերթապահը սահմանված կարգով չի գրանցել հանցագործության դեպքը, այլ ուղեկցել է բաժնի պետի և տեղակալի մոտ, ովքեր համոզել են հաղորդում չտալ` խոստանալով, որ հանցագործները կվերադարձնեն գողոնը:

Մալխաս Ասատրյանի հաղորդման առթիվ ՀՀ հատուկ քննչական ծառայությունում հարուցվել է քրեական գործ` ՀՀ քրեական օրենսգրքի 308-րդ հոդվածի 1-ին մասի և 177-րդ հոդվածի 3-րդ մասի 1.1 կետի հատկանիշներով:

Թեպետ Մալխաս Ասատրյանը նախազգուշացվել էր ցուցմունք տալուց հրաժարվելու դեպքում նախատեսված քրեական պատասխանատվության մասին, այդուհանդերձ, նախաքննության ընթացքում նա հրաժարվել է ցուցմունքներ տալ՝ իր տնից կատարված գողության առնչությամբ ոստիկանության Կումայրիի բաժնի աշխատակիցների կողմից հաղորդում չընդունելու հանգամանքների մասին:

Մալխաս Ասատրյանին մեղադրանք է առաջադրվել ՀՀ քրեական օրենսգրքի 339-րդ հոդվածի 1-ին մասի հատկանիշներով:

Առաջադրված մեղադրանքում Մալխաս Ասատրյանն իրեն մեղավոր է ճանաչել և որպես մեղադրյալ՝ կրկին հրաժարվել է այդ հանգամանքների շուրջ ցուցմունքներ տալ:

Քրեական գործը մեղադրական եզրակացությամբ հանձնվել է նախաքննության նկատմամբ հսկողություն իրականացնող դատախազին՝ այն հաստատելու և դատարան ուղարկելու համար: