Փաստ ինֆո

Ազգային ժողովի «Ժառանգություն» խմբակցության անդամ Զարուհի Փոստանջյանը հանդես է եկել Օսմանյան կայսրությունում պոնտոսահույների, ասորիների, եզդիների և այլ ազգերի ցեղասպանությունը որպես մարդկության դեմ ուղղված ծանրագույն հանցագործություն դատապարտելու և մայիսի 19-ը այդ ցեղասպանության զոհերի հիշատակի օր հռչակելու մասին օրենսդրական նախաձեռնությամբ:

Այսօր՝ սեպտեմբերի 23-ին, ԱԺ-ում պաշտոնական շրջանառության մեջ է դրվել «Օսմանյան կայսրությունում պոնտոսահույների, ասորիների, եզդիների և այլ ազգերի ցեղասպանության դատապարտման մասին» օրինագիծը և դրանից բխող՝ «Հայաստանի Հանրապետության տոների և հիշատակի օրերի մասին» գործող օրենքում լրացում կատարելու մասին ընդդիմադիր պատգամավորի հեղինակած օրենսդրական փաթեթը:

Զ. Փոստանջյանը որպես հիմնավորում ընդգծում է, որ Առաջին համաշխարհային պատերազմի և դրան հաջորդող տարիներին՝  1912-1923 թվականներին, Օսմանյան կայսրությունում հույների զանգվածային տեղահանությունները, կոտորածները, նրանց տաժանակիր աշխատեցնելը և սեփականությունից զրկելը հայ, հույն, ասորի, եզդի և այլ բնիկ ժողովուրդների դեմ Օսմանյան կայսրության ցեղասպան քաղաքականության բաղադրիչ մասերն են:

Առաջին համաշխարհային պատերազմից առաջ Օսմանյան կայսրությունում, համաձայն օսմանական պաշտոնական տվյալների, ապրում էր առնվազն 2.7 միլիոն հույն: Աղբյուրների և արխիվային փաստաթղթերի ուսումնասիրություններն ապացուցում են, որ 1912-1923 թվականներին զոհվել են ավելի քան յոթ հարյուր հազար հույներ` կոտորածների, ինչպես նաև բռնագաղթի, տաժանակիր աշխատանքների, սովի հետևանքով:

Պատգամավորը նշում է, որ Հունաստանի խորհրդարանն երկու տարբեր առիթներով ճանաչել  է Օսմանյան կայսրության կողմից պոնտոսահույների հանդեպ իրականացված ցեղասպանությունը: 1994թ. փետրվարին միաձայն որոշում է կայացրել մայիսի 19-ը հայտարարել պոնտոսահույների ցեղասպանության հիշատակի օր, իսկ 1998-ին` սեպտեմբերի 14-ը որպես Փոքր Ասիայի համայն հույների ցեղասպանության հիշատակի օր:

 Զ.Փոստանջյանը հիշեցնում է, որ Հունաստանի խորհրդարանը 1996թ. ապրիլի 25-ին բանաձև է ընդունել` ապրիլի 24-ը ճանաչել՝ որպես «Թուրքիայի կողմից հայոց ցեղասպանության օր», իսկ բոլորովին վերջերս՝ 2014թ. սեպտեմբերի 9-ին, ընդունել է հայերի և պոնտացի հույների ցեղասպանությունների ժխտումը քրեականացնող բանաձև:

«Ցավոք, ցեղասպանություններ տեղի են ունենում նաև մեր օրերում: Բոլորովին վերջերս Հյուսիսային Իրաքի Շանգալ եզդիաբնակ տարածքում «Իսլամիստական պետություն» ահաբեկչական կազմակերպության կողմից եզդի ժողովուրդն ենթարկվեց մասսայական կոտորածի»,-ընդգծում է Զ.Փոստանջյանը:

Նրա հիմնավորմամբ՝ դատապարտելով Օսմանյան կայսրությունում պոնտոսահույների, ասորիների և այլ ազգերի դեմ իրականացված հանցագործությունը, պարտավորվում ենք նաև մեր ներդրումն ունենալ ապագայում նման ոճրագործությունները կանխելու հարցում: