Փաստ ինֆո

Կառավարության շենքի դիմաց այսօր առավոտից բողոքի ակցիա կազմակերպած երևանյան տոնավաճառների աշխատակիցները քիչ առաջ ցրվեցին` որոշելով բողոքի ակցիան դադարեցնել, բայց միայն ժամանակավորապես` մինչև կառավարության առաջիկա նիստի օրը:

Ակցիայի կազմակերպիչները, լրագրողների հարցին ի պատասխան, վստահեցրել են, որ չեն նահանջելու այնքան ժամանակ, քանի դեռ կառավարությունը, ի զորու չլինելով պայքարել խոշոր բիզնեսի ստվերի դեմ, կփորձի մանր ու միջին բիզնեսը ծառայեցնել իր այդ նպատակին:

Հիշեցնենք՝ հոկտեմբերի 1-ից ուժի մեջ մտնող «Շրջանառության հարկի մասին» նոր օրենքով՝ առաջարկվում է փոքր և միջին բիզնեսի ներկայացուցիչների համար շրջանառության հարկի դրույքաչափը 3.5 տոկոսից նվազեցնել մինչև 1 տոկոս, բայց տնտեսվարողներն էլ պետք է հստակ ներկայացնեն իրենց շրջանառության բոլոր փաստաթղթերը:

Ինչպես արդեն տեղեկացրել ենք, այսօր բողոքի ակցիայի մասնակիցների հետ հանդիպել է նաև վարչապետ Հովիկ Աբրահամյանը:

Ինչպես հաղորդում են կառավարության մամուլիծառայությունից, Հովիկ Աբրահամյանը լսել է տնտեսվարողների դիտարկումներն ու փաստարկները և վստահեցրել, որ օրենքն ուղղված է խոշոր հարկատուներին հարկային դաշտ բերելուն, իսկ մանր ու միջին բիզնեսն այդ օրենքի կիրառումից որևէ կերպ չի տուժի:

Վարչապետի խոսքով՝ կառավարության նպատակն է, որպեսզի ՓՄՁ-ները խոշոր ընկերությունների համար չդառնան հարկերը թաքցնելու հարթակ և գործիք: Կառավարության ղեկավարն ընդգծել է, որ հարկային ծառայողները ՓՄՁ-ներում ստուգումներ կիրականացնեն միայն այն դեպքերում, երբ կլինեն ռիսկեր. ուշադրության կենտրոնում են գտնվելու խոշոր հարկ վճարողները:

Միաժամանակ, Հովիկ Աբրահամյանը շեշտել է, որ կառավարությունը ՓՄՁ-ներին չի դիտարկում որպես հարկատու, հակառակը՝ ընդունված օրենքով՝ պետական բյուջեի մուտքերը նվազելու են 10 մլրդ դրամով, քանի որ ՓՄՁ-ներն այսուհետ 3,5 տոկոսի դիմաց վճարելու են 1 տոկոս շրջանառության հարկ:

«Կառավարությունը հրաժարվել է այդ գումարից, որպեսզի փոքր ու միջին բիզնեսը զարգանա, ծաղկի: Դա է մեր նպատակը: Ձեզ խնդրում ենք՝ առանց փաստաթղթի մի աշխատեք: Կառավարությունը ձեր հարկային բեռը թեթևացրել է, որպեսզի դուք կայանաք»,- ՓՄՁ ներկայացուցիչներին հավաստիացրել է վարչապետը:

Անդրադառնալով տնտեսվարողների այն դիտարկմանը, թե խոշոր բիզնեսն ապրանքը վաճառելուց իրենց փաստաթուղթ չի տրամադրում՝ Հովիկ Աբրահամյանը նշել է. «Դուք պետք է օգնեք, որպեսզի խոշորներին բերենք օրինական դաշտ: Սա է մեր նպատակը: Մենք ձեր թշնամին չենք, մենք ձեզ օգնելու ենք, աջակցելու և ամեն ինչ անելու ենք, որպեսզի դուք կայանաք»:

Եվ, այդուհանդերձ, հայ մանր ու միջին վաճառակեններին կառավարության ղեկավարի այս պատասխանը չի բավարարել: Բողոքի ակցիան կշարունակվի նաև հինգշաբթի՝ սեպտեմբերի 25-ին` կառավարության առաջիկա նիստի օրը: