Փաստ ինֆո

Շանթ Հարությունյանի ու մյուսների գործով այսօր սկսեցին պաշտպանական ճառերով հանդես գալ պաշտպանները:

«Ցեղակրոն» կուսակցության նախագահ Շանթ Հարությունյանի, նրա անչափահաս որդու՝ Շահեն Հարությունյանի ու պահեստազորի փոխգնդապետ Վարդան Վարդանյանի պաշտպան Ինեսսա Պետրոսյանը միջնորդեց իր պաշտպանյալներին ճանաչել անմեղ ու արդարացնել:

Ըստ պաշտպանի՝ Շանթ Հարությունյանը նախաձեռնել էր արժեքների հեղափոխություն, նա ու նրա ընկերները նստացույցից հետո փորձել են խաղաղ երթ անցկացնել, որի ավարտին նորից վերադառնալ և շարունակել նստացույցը՝ այդպիսով իրացնելով իրենց սահմանադրական իրավունքը, սակայն  ոստիկանները սահմանափակել են նրանց այդ իրավունքը:

Արդյունքում ստացվել է, որ նրանց առաջադրվել են խուլիգանության մեղադրանքներ՝ կարծիք հայտնելու ու հավաքներ կազմակերպելու իրենց սահմանադրական իրավունքները պաշտպանելու համար:

Ըստ պաշտպանի՝ գործով կատարվել է միակողմանի քննություն՝ ոստիկան տուժողների ու վկաների ցուցմունքների հիման վրա: Ինեսսա Պետրոսյանն ընդգծեց, որ որևէ քննություն չի կատարվել ոստիկանների գործողությունների առումով:

Պաշտպանը նշեց, որ ոստիկանները աջ ու ձախ կողմերից փակել են մայթեզրերը, երթի մասնակիցներին ուղղորդելով դեպի փողոց, ապա բռնություն գործադրելով  նրանց նկատմամբ՝ խափանել խաղաղ երթը: Դեռ մինչև երթն սկսելը՝ Շանթ Հարությունյանը զգուշացրել է հնարավոր սադրանքների մասին. պատահական չէ, որ Շանթ Հարությունյանն իր անչափահաս որդուն հագցրել է իր զրահաբաճկոնը՝ սադրանքներից նրան պաշտպանելու համար:

Ըստ պաշտպանի՝ վեց քաղաքացիական հագուստով ոստիկաններ ներդրված էին՝ Երևանի փոխոստիկանապետ, գործով տուժող Վալերի Օսիպյանի  կողմից հստակ հրահանգավորումներով: Սադրիչների ներդրումն էլ պատճառ դարձավ՝ ոստիկանության ու երթի մասնակիցների միջև տեղի ունեցած բախումների համար: Սադրանք են նաև ոստիկանական պնդումները, թե երթի մասնակիցներից լսել են հայտարարություններ՝ «միլիցիա է՝ խփեք», դա չի հաստատվում գործի տվյալներով:

«Չարտոնված երթ» հասկացությունն այս պարագայում ևս, ըստ պաշտպանի, անհիմն է. մինչև 100 հոգի մասնակիցներով երթի պարագայում իրազեկումը պարտադիր չէ, իսկ այն պնդումը, թե երթին մասնակցել են 100 և ավելի մասնակիցներ, չի հաստատվում գործի տվյալներով: 

Ոստիկաններն իրենց հերթին երթը ցրելուց առաջ պարտավոր էին բարձրախոսով նախազգուշացնել երթի՝ անօրինական լինելու մասին, ինչը չեն արել:

Պաշտպանը անդրադարձավ անչափահաս Շահեն Հարությունյանի մեղադրանքին՝ դեպքի դրությամբ 14 տարեկան անչափահասը տեսել է, թե ինչպես են  ոստիկանները գետնին տապալել իր հորը ու ծեծում: Նա իր ձեռքի բարձրախոսով հարվածել է ոստիկանին՝ փորձելով ազատել հորը ծեծից ու ոստիկանների ուշադրությունը շեղել դեպի իր կողմը:

Անչափահասի գործողությունները պայմանավորված էին ոստիկանների գործողություններով ու անչափահասի հուզական հոգեվիճակով:

Անչափահասին հետապնդել են, ծեծի ենթարկել, իսկ ոստիկանության բաժնում նրան ենթարկել նաև հոգեբանական ճնշման, նրան «տեղեկացնելով», որ իր  հայրն ու նրա ընկերները այլևս չկան:

Շանթ Հարությունյանն ու Վարդան Վարդանյանն իրենց հերթին հայտարարել են՝ բերման ենթարկվելուց հետո իրենց նկատմամբ բռնություն գործադրելու մասին: Շանթ Հարությունյանի վրա ճնշում գործադրելու միջոց էր նրան հոգեկան խնդիրներ վերագրելը, սակայն դա չստացվեց. նա ճանաչվեց մեղսունակ, ապա՝ տեսակցություններն արգելելը:  Շանթ Հարությունյանը իր բողոքն էր արտահայտել դրա դեմ՝ հացադուլի դիմելով, որը տևել էր 17 օր և ավարտվել նրա  ուշագնացությամբ:    

«Սա հաշվեհարդար ու վրեժխնդրություն է»,- ասաց պաշտպանը՝ ընդգծելով, որ ամիսներ շարունակ Շահենի նկատմամբ մեղադրանք չէին առաջադրում: Մտորումներից հետո առաջադրել են խուլիգանության մեղադրանք, որի հանցակազմը նրա արարքում բացակայում է:

Այդ հանցակազմը բացակայում է նաև Շանթ Հարությունյանի ու Վարդան Վարդանյանի գործողություններում, մասնավորապես՝ սահմանների պաշտպանության, զինվորների ու սպաների կրթման ու դաստիարակության գործին իրեն նվիրած Վարդան Վարդանյանի համար խուլիգանության մեղադրանքն անգամ վիրավորական է: