Փաստ ինֆո

Փաստաբան Լևոն Բաղդասարյանն այլևս չի իրականացնում Վերնիսաժի գործի շրջանակներում կալանավորված Վալերի Հովհաննիսյանի պաշտպանույունը:

Այս մասին փաստաբանը հայտնեց «Փաստինֆո»-ի հետ զրույցում` նշելով, որ ինքը Վալերի Հովհաննիսյանի հետ օրեր առաջ խզել է ծառայությունների մատուցման պայմանագիրը:

Հարցին, թե ու՞մ նախաձեռնությամբ է կայացվել նման որոշումը, Լևոն Բաղդասարյանը չցանկացավ պատասխանել:

«Հաշվի առնելով իմ վստահորդի շահերը՝ ես ձեռնպահ կմնամ մեկնաբանություն անելուց: Երբ կավարտվի նախաքննությունը, դատաքննությունը, այդ հարցին կարող եք անդրադառնալ»,- ասաց Լևոն Բաղդասարյանը:

Հիշեցնենք՝ Վալերի Հովհաննիսյանը Վերնիսաժի մոտ ` ԲՀԿ-ական պատգամավոր Կարո Կարապետյանի փեսայի` Գոռ Առաքելյանի վարած ավտոմեքենայի ճանապարհը փակողներից և վիճաբանության մասնակիցներից մեկն է եղել, ով կրակոցների արդյունքում ծանր վնասվածքներ էր ստացել և տեղափոխվել հիվանդանոց:

Մինչև հուլիսի 4-ը` մինչև Կենտրոն և Նորք Մարաշ վարչական շրջանների ընդհանուր իրավասության դատարանի կողմից կալանավորման որոշումը կայացնելը, Վալերի Հովհաննիսյանը 2 վիրահատություններից հետո դեռ շարունակում էր բուժում ստանալ հիվանդանոցում:  

Նրա արդեն նախկին փաստաբան Լևոն Բաղդասարյանը մամուլում բազմիցս հայտարարել էր, որ կալանքի որոշումը կայացնելու համար իր պաշտպանյալին դատարան են տեղափոխել պատգարակի վրա՝ գրեթե անգիտակից, բարձր ճնշմամբ, վիրահատությունից հետո աղիքը կողքից կախված:

Օրեր առաջ Վալերի Հովհաննիսյանի վիճակը «Նուբարաշեն» ՔԿՀ-ում դարձյալ վատացել էր; Նրան տեղափոխել են «Դատապարտյալների հիվանդանոց» ՔԿՀ, որտեղ այժմ գտնվում է բժիշկների հսկողության տակ:

Լուսանկարը Armenpress-ի