Փաստ ինֆո

Գյումրիի «հակամարտության» գործով այսօր սկսվեց պաշտպանական կողմի վերաքննիչ բողոքի հրապարակումը: Գործով միակ ամբաստանյալ, Գյումրիի նախկին քաղաքապետի եղբորորդի Վահե Ղուկասյանի պաշտպան Հայկ Ալումյանը միջնորդեց  17 տարվա ազատազրկման  դատապարտված իր պաշտպանյալին  առաջադրված մեղադրանքի երեք հոդվածներից  երկուսում՝  ՀՀ քրեական օրենսգրքի 104-րդ հոդվածի 1-ին մասով՝ սպանություն, 34-104-րդ հոդվածի 2-րդ մասի 6-րդ կետով՝ շատերի կյանքի համար վտանգավոր եղանակով սպանության փորձ, նրան ճանաչել անմեղ, իսկ ՀՀ քրեական օրենսգրքի 235-րդ հոդվածի 1-ին մասով՝ ապօրինի զենք կրելը, նշանակել առավել մեղմ պատիժ:

Ըստ մեղադրանքի` Վահե Ղուկասյանը 2013թ ապրիլի 23-ի առավոտյան, ապօրինի կերպով ձեռք բերված և  իր մոտ պահվող հրազենով փորձել էր շատերի կյանքի համար վտանգավոր եղանակով ապօրինաբար դիտավորությամբ կյանքից զրկել Հարություն Խաչատրյանին, սակայն իր կամքից անկախ հանգամանքներով չէր կարողացել հանցագործությունն ավարտին հասցնել, այնուհետև ապօրինաբար դիտավորությամբ կյանքից զրկել էր Արտյոմ Կարապետյանին, ով  Գյումրիում առավել հայտնի է «Շեկո» մականունով։ Զինված միջադեպը տեղի էր ունեցել «Քավոր Հարութ»-ի` Հարություն Խաչատրյանի տան մոտ։

Վահե Ղուկասյանը հերքել է ու շարունակում է հերքել դատավճռի հիմքում դրված մի  շարք  հանգամանքներ՝ այն, որ ինքը ցանկացել է սպանել Գյումրի քաղաքի բնակիչ Հարություն  Խաչատրյանին, այդ նպատակով  2013 թվականի ապրիլի 23-ին առավոտյան, ավտոմեքենայով շրջել է Գյումրի քաղաքի  մի շարք փողոցներով` նպատակ ունենալով հանդիպել Հարություն Խաչատրյանին և իրականացնել իր մտադրությունը:   Ապա փողոցներից մեկում հանդիպելով  «Մերսեդես Բենց» մակնիշի ավտոմեքենայում գտնվող Հարություն Խաչատրյանին և Արտյոմ Կարապետյանին հետապնդել է նրանց: Վ.Ղուկասյանը չի ընդունում նաև, որ առաջինն ինքն է կրակել և որ ինքը  դիտավորյալ կրակել է Արտյոմ Կարապետյանի վրա: Վերոհիշյալ պնդումներն, ըստ պաշտպանական կողմի,  հերքվում են գործի տվյալներով:   

Նախ գործի քննության արդյունքում դատավճռում հստակ նշված է՝  «գործով չպարզված շարժառիթով» և իրոք ամբաստանյալն ու տուժողներն, ըստ պաշտպանի,  իրար չեն ճանաչել ու միմյանց հանդեպ որևէ  թշնամանք չեն տածել: Տուժող Հարություն Խաչատրյանը նույնպես հայտարարել է, որ չի ճանաչել Վահե Ղուկասյանին: Բացի այդ, ըստ պաշտպանական կողմի, Հարություն Խաչատրյանին գտնելու համար կարիք չկար ողջ Գյումրիով շրջել,  Գյումրիում բոլորին է հայտնել, թե որտեղ կարելի է նրան գտնել՝ նրա տանը:

Պաշտպանական կողմն անհիմն է համարում թվով  7 վկաների մինչդատական վարույթի ընթացքում ցուցմունքներին նախապատվություն տալն ու   դատաքննական ցուցմունքները ոչ արժանահավատ համարելը: Որևէ կերպ հիմնավորված չէ դատարանի պնդումը, որ դատաքննական ցուցմունքներով վկաները նպատակ են ունեցել «պաշտպանության տակ առնել Վահե Ղուկասյանին»  այն դեպքում, որ վկաներն ու ամբաստանյալն իրար առհասարակ չեն ճանաչել և նրանց միջև ոչ բարեկամական,  ոչ էլ թշնամական հարաբերություններ գոյություն չեն ունեցել:  Դատարանը սոսկ ենթադրությունների հիման վրա, ըստ Հայկ Ալումյանի,  պարզապես պիտակավորել է վկաներին՝ նրանց ուղղակի մեղադրելով քրեորեն հետապնդելի սուտ ցուցմունք տալու մեջ: Հայկ Ալումյանը հիշեցրեց, որ կասկածները փարատվում են հօգուտ և ոչ թե ի վնաս մեղադրյալի:

Ըստ պաշտպանական կողմի, անհիմն է նաև մեղադրանքի կողմի ու դատարանի պնդումը, որ Վահե Ղուկասյանն առաջինն է կրակել: Վերջինս առանց զենքի է դուրս եկել մեքենայից, առաջինը Արտյոմ Կարապետյանն է կրակել, Վահե Ղուկասյանը վերադարձել է իր մեքենայի մոտ, մեքենայից վերցրել զենքը ու պատասխան կրակոց արձակել:

Պաշտպանական կողմը վերաքննիչ բողոքը կշարունակի ներկայացնել հաջորդ նիստում: