Փաստ ինֆո

14-ամյա անչափահաս տղան մեղադրվում է մեկ ուրիշի տղայի դանակով մեկ անգամ հարվածելու և դիտավորությամբ ծանր վնաս պատճառելու մեջ, սակայն առաջադրված մեղադրանքում իրեն մեղավոր չի ճանաչում:

Անչափահաս ամբաստանյալը բնակվում է ծնողների հետ եւ ունի 9-ամյա կրթություն։ Ներկայումս սովորում է ուսումնարանում, առաջին կուրսի ուսանող է, ապագա ավտոէլեկտրիկ:

Ինչ վերաբերում է տուժողին և նրա ներկայացուցչին, ապա նրանք այսօրվա դատական նիստում հրաժարվեցին փաստաբան ունենալուց և հայտարարեցին, որ քաղհայց չեն ցանկանում ներկայացնել:

Երևանի Ավան և Նոր-Նորք վարչական շրջանների ընդհանուր իրավասության դատարանում, նախագահությամբ Դավիթ Հարությունյանի, այսօր սկսվեց գործով դատաքննությունը և մեղադրող դատախազը հրապարակեց մեղադրական եզրակացությունը։

Ըստ մեղադրական եզրակացության՝ անչափահասը 2014թ. ապրիլի 16-ին Երևան քաղաքի թիվ 186 դպրոցում վիճաբանել է իր համադասարանցի մի տղայի հետ և միմյանց հասցեին հնչեցրած վիրավորական արտահայտությունների առիթով նույն օրը՝ ժամը 14:30-ի սահմաններում, հիշյալ դպրոցի բակում վիճաբանել նրա և վերջինիս 4 ընկերների հետ, որի ընթացքում նախապես իր հետ տանից վերցրած դանակով մեկ անգամ հարվածել է մի երիտասարդի և դիտավորությամբ նրա առողջությանը պատճառել ծանր վնաս՝ կյանքին վտանգ սպառնացող:

Անչափահաս տղային մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով:

Դատարանի կողմից սահմանված ապացույցների հաջորդականության համաձայն՝ նախ կհարցաքննվեն վկաները, ապա՝ տուժողները, որից հետո կհետազոտվեն գործում առկա գրավոր ապացույցները, իսկ վերջում կհարցաքննվի անչափահաս ամբաստանյալը:

Այսօրվա նիստում առաջինը հարցաքննության հրավիրվեց անչափահաս ամբաստանյալի մայրը՝ Ժաննա Մանուկյանը, ով նախաքննության ընթացքում
ցուցմունք է տվել, իսկ դատարանում օգտվեց իր իրավունքներից եւ հրաժարվեց ցուցմունք տալուց։ Արդյունքում՝ մեղադրանքը պաշտպանող դատախազի միջնորդությամբ դատարանը հրապարակեց վկայի նախաքննական ցուցմունքը:

Նախաքննության ընթացքում տղայի մայրը մասնավորապես պատմել էր, որ դեպքի օրն իրեն զանգահարել են դպրոցից, և ինքն անմիջապես գնացել է դպրոց, որտեղ պարզվել է, որ որդին փախել է ֆիզկուլտուրայի դասից։ Տանն արդեն մայրը որդուն հայտնաբերել է ձեռքը վնասված, որն արնահոսել է։

Ի պատասխան մոր հարցումների՝ որդին պատմել է, որ վիճաբանել է, ինչի ժամանակ էլ ստացել է այդ վնասվածքը։

Ըստ մոր նախաքննական ցուցմունքի՝ վիճաբանությունը տեղի է ունեցել «ապե» բառի համար. տղաներն իրար չեն հասկացել սկսել են հայհոյել իր որդուն:

Մայրը նաև նշել էր, որ հանցագործության զենք հանդիսացած դանակը, որն ամուսինը նետել էր բակ, ինքը վերցրել է և հանձնել նախաքննական մարմնին:

Վկայի ցուցմունքի հրապարակումից հետո մեղադրողը դատարանին խնդրեց նիստը հետաձգել, քանի որ վերաքննիչ դատարանում նիստ ունի նշանակված:

Հաջորդ դատական նիստը նշանակվել է հոկտեմբերի 6-ին: