Փաստ ինֆո

Սեպտեմբերի 17-ին Ազգային ժողովում շրջանառության մեջ է դրվել սահմանային գոտու համայնքներին արտոնություններ տրամադրելու մասին «Բարգավաճ Հայաստան» խմբակցության քարտուղար Նաիրա Զոհրաբյանի և խմբակցության անդամ Միքայել Մելքումյանի օրենսդրական նախաձեռնությունը:

Հեղինակների հիմնավորմամբ՝ օրենսդրական փաթեթը ներառում է ՀՀ տարբեր օրենքներում փոփոխություններ և լրացումներ կատարելու առաջարկություններ, որոնք կնպաստեն սահմանային գոտու բնակավայրերում ներդրումների ներգրավմանը, գործարար միջավայրի բարելավմանը և համայքներում բնակչության կենսամակարդակի բարձրացմանը:

Համաձայն «Հայաստանի Հանրապետության պետական սահմանի մասին» օրենքի` սահմանային գոտին այն տարածքն է, որը ՀՀ պետական սահմանագծից ծավալվում է դեպի Հայաստանի Հանրապետության տարածքի խորքը` մինչև հինգ կիլոմետր լայնությամբ: Սահմանային շերտը սահմանային գոտու մի մասն է, որը հարում է պետական սահմանին կամ պետական սահմանը ջրային տարածքով անցնելիս սահմանային ջրերի ափերին` մինչև մեկ կիլոմետր լայնությամբ:

Սահմանային գոտին ներկայումս ձգվում է 9 մարզերի տարածքով` Արագածոտնի, Արարատի, Արմավիրի, Գեղարքունիքի, Լոռու, Շիրակի, Սյունիքի, Վայոց ձորի, Տավուշի:

Սահմանի երկարությունը 1431 կմ է, որից Ադրբեջանի հետ` 893. 6 կմ, այդ թվում Նախիջեւանի հետ` 190.7 կմ, Թուրքիայի հետ` 289 կմ, Վրաստանի հետ` 211 կմ, Իրանի հետ` 37 կմ:

Սահմանամերձ շերտը կազմում է 1431քառ. կմ տարածք, իսկ սահմանային գոտին` 7155 քառ. կմ կամ ՀՀ տարածքի 24 %-ը:

Սահմանային գոտում են գտնվում 9 քաղաքային և 173 գյուղական համայնքներ, այն է՝ հանրապետության գյուղական բնակավայրերի 20. 7 %-ը, իսկ սահմանային շերտում՝ 4 քաղաքային և 59 գյուղական համայնք:

ԲՀԿ-ական պատգամավորները, մասնավորապես, առաջարկում են «Հայաստանի Հանրապետության սահմանային գոտու համայնքների (բնակավայրերի) գյուղացիական տնտեսություններին տրամադրվող գյուղացիական վարկերի սուբսիդավորման մասին» օրինագծով սահմանել, որ յուրաքանչյուր տարվա պետական բյուջեի մասին օրենքում նախատեսվում է գյուղացիական վարկերի սուբսիդավորում՝ ոչ պակաս քան 10 %-ի չափով:

«Շրջանառության հարկի մասին» օրենքում այս փաթեթով նախատեսված լրացմամբ առաջարկվում է սահմանային գոտու բնակավայրերում գրանցված շրջանառության հարկ վճարողների յուրաքանչյուր հաշվետու ժամանակաշրջանի համար շրջանառության հարկի հաշվարկման համար սահմանել 0-ական տոկոսադրույք՝ առևտրական, արտադրական և այլ գործունեությունից եկամուտների համար:

«Արտոնագրային վճարների մասին» օրենքում նախատեսված փոփոխությամբ սահմանային գոտու բնակավայրերում գրանցված արտոնագրային վճար վճարողների կողմից վճարվող արտոնագրային վճարի հաշվարկման համար առաջարկվում է սահմանել 0 գործակից, այն է՝ տնտեսական ակտիվության խթանման նպատակով արտոնագրային վճարներից ազատում:

«Հողի հարկի մասին» և «Գույքահակի մասին» օրենքներում նախատեսված լրացմամբ սահմանվում է սահմանամերձ բնակավայրերի բնակիչների հողի հարկի և գույքահարկի գծով պարտավորությունների՝ պետական բյուջեից փոխհատուցում:

Ինչպես «Փաստինֆո»-ն ավելի վաղ հայտնել էր, օգոստոսի 19-ից պաշտոնական շրջանառության մեջ է նաև նույն խնդրին նվիրված մեկ այլ՝ ԱԺ  «Հայ ազգային կոնգրես» խմբակցության անդամ Նիկոլ Փաշինյանի հեղինակած «Սահմանապահ համայնքների մասին» օրինագիծը:

Ի տարբերություն նոր՝ ԲՀԿ-ական պատգամավորների նախաձեռնության, որի  վերաբերյալ կառավարության եզրակացություն դեռևս չկա, Ն.Փաշինյանի հեղինակած օրինագծի եզրակացություն տալու մասին հարցն ընդգրկված է կառավարության այսօրվա նիստի օրակարգում:

Ըստ եզրակացության նախագծի, կառավարությունը ողջունում է օրենսդրական նախա¬ձեռ¬նության հեղինակի՝ սահմանամերձ համայնքների բնակիչներին արտոնությունների տրամադրման, ինչպես նաև սոցիալական երաշխիքներով ապահովման նպատակադրումը:

Նաև նշվում է, որ այդ նպատակով վարչապետի  2014 թվականի սեպտեմբերի 3-ի որոշմամբ ստեղծվել է աշխատանքային խումբ, որին հանձնարարվել է կատարել ներկայիս կարիքների գույքագրում, սահմանամերձ համայնքների համար մշակել հարկային և սոցիալական արտոնությունների համակարգ և նշված համակարգի ներդրման առանձնահատկությունները տարբերակելու նպա-տակով կատարել սահմանամերձ համայնքների դասակարգում:

Արդյունքում կձևավորվի արտոնություններ սահմանող օրենսդրական նախաձեռնությունների փաթեթ, որով սահմանամերձ համայնքների բնակչության շրջանում առկա խնդիրներին կտրվեն համապարփակ և ամբողջական լուծումներ:

Հաշվի առնելով, որ խնդրի կարգավորման նպատակով կառավարությունն առաջարկություններ է ստացել նաև Ազգային ժողովի այլ պատգամավորներից, գերատեսչություններից և հասարակական կազմակերպություններից, Ն.Փաշինյանին առաջարկվում է առայժմ ձեռնպահ մնալ օրենքի նախագծի քննարկումից և համագործակցել կառավարության հետ՝ ԱԺ քննարկմանը միասնական և ամբողջական նախագծերի փաթեթ ներկայացնելու համար: