Փաստ ինֆո

«Ժողովուրդ»-ի տեղեկություններով՝ օրերս ԲՀԿ նախագահին պատկանող «Շանգրիլա» խաղատանն արտառոց դեպք է տեղի ունեցել:

Ինչպես թերթն է գրում, խաղատան հաճախորդներից մեկն ահազանգել է ընկերներին, որի արդյունքում զինված մարդիկ հավաքվել են խաղատան դիմաց՝ «ռազբորկայի»:

Ըստ լրատվամիջոցի տեղեկությունների՝ խաղատան հաճախորդներից մեկին զայրացրել է այն, որ խաղատան սարքը ժամեր շարունակ խաբել է իրեն:

Խաղատան աշխատակիցները վստահեցրել են, որ սարքը չի կարող խաբել, և ամեն ինչ ճիշտ է:

Իսկ հաճախորդին չեն համոզել այդ հավաստիացումները և նա փորձել է այլ կերպ հետ վերադարձնել իր գումարները:

Այս ամենի արդյունքում՝ նա զանգահարել է իր ընկերներին, ովքեր հայտնվել են խաղատան դիմաց և սկսել «հաշիվներ մաքրել»՝ իրենց ընկերոջը խաբելու կապակցությամբ:

Թերթի տեղեկություններով՝ երբ իրավիճակը թեժացել է, խաղատան աշխատակիցները զանգահարել են Գագիկ Ծառուկյանի անվտանգության պետ Էդուարդ Բաբայանին:

Ի վերջո, խնդիրը կարծես խաղաղությամբ է լուծվել. ըստ երևույթի, անվտանգության պետի հորդորով խաղատան տնօրինությունը հետ է վերադարձրել հաճախորդի գումարները:

«Չի բացառվում նաև, որ  սարքն ամենևին էլ անսարք չի եղել, սակայն Էդոն կատարել է զինված ամբոխի պահանջները մեկ նպատակով՝ ԲՀԿ առաջնորդի անվան շուրջ աղմուկ չբարձրացնելու պատճառով»,- գրում է թերթը և հավելում, որ դեռևս 2009թ. ՎՊ-ն խաղատների գործունեության մասով աղմկահարույց բացահայտում էր կատարել, որով պարզվել էր, որ Հայաստանում խաղատների սարքերը մարդկանց մոլորության մեջ են գցում:

Ստուգումների արդյունքում ՎՊ-ն պարզել էր, որ շահումով խաղերի համար նախատեսված ավտոմատ սարքերը Հայաստանում են արտադրվում:

Այսինքն՝ կմախքը հավաքվում է այստեղ, իսկ «ուղեղը», ինչպես թերթն է նշում, բերվում է դրսից:

Հոդվածն ամբողջությամբ կարող եք կարդալ «Ժողովուրդ» օրաթերթի` 16.09.2014թ. համարում: