Փաստ ինֆո

Սիրիայի Արաբական Հանրապետության քաղաքացի, ազգությամբ քուրդ, 23-ամյա Լողման Ալի Հեսսիի նկատմամբ  ՀՀ քրեական օրենսգրքի 329 հոդվածի 1-ին մասով՝ պետական սահմանն ապօրինի հատելը, կարճվել է և քրեական հետապնդումը դադարեցվել՝ մեղադրողի կողմից քրեական հետապնդում իրականացնելուց հրաժարվելու հիմքով։

Ամբաստանյալ Լողման Ալի Հեսսիի  նկատմամբ որպես խափանման միջոց ընտրված կալանավորումը վերացվել և նա անհապաղ ազատ  է արձակվել դատական նիստերի դահլիճից:

ՀՀ ԱԱԾ քննչական վարչության քննիչի որոշմամբ առանց պատշաճ թույլտվության ՀՀ պահպանվող պետական սահմանն ապօրինի հատելու դեպքի առթիվ քրեական գործ էր հարուցվել՝ ՀՀ քրեական օրենսգրքի 329-րդ հոդվածի 1-ին մասով, քննիչի մեկ այլ որոշմամբ Լողման Ալի Հեսսիին մեղադրանք էր առաջադրվել նույն հոդվածով, նրա նկատմամբ, դատարանի որոշմամբ, ընտրվել կալանավորումը՝ որպես խափանման միջոց:

Ըստ նախաքննական մարմնի կողմից առաջադրված մեղադրանքի, Լողման Ալի Հեսսին, 2014թ. մայիսի 18-ին Թուրքիայի Հանրապետության տարածքից անցնելով Ախուրյան գետը և հաղթահարելով Հայաստանի Հանրապետության պետական սահմանի ինժեներատեխնիկական արգելքները, N զորամասի հսկողության տակ գտնվող սահմանային նշանից 300 մետր դեպի հյուսիս տարածքով ժամը 16:30-ի սահմաններում, առանց պատշաճ թույլտվության, ապօրինի հատել է պահպանվող պետական սահմանը և նույն օրը՝ ժամը 17:30-ի սահմաններում, հայտնաբերվել է Արմավիրի մարզի Բագարան գյուղում:

Քրեական գործի նախապատրաստական փուլում ամբաստանյալ Լողման Ալի Հեսսիի շահերի պաշտպան Նիկոլայ Բաղդասարյանը դատարանին միջնորդել էր իր պաշտպանյալի նկատմամբ քրեական հետապնդումը դադարեցնել, քրեական գործի վարույթը կարճել և նրան անհապաղ ազատ արձակել դատական նիստերի դահլիճից:   

Գործով մեղադրող Հայկ Հակոբյանը, հայտնաբերելով քրեական հետապնդումը բացառող հանգամանքներ, հրաժարվել էր  ամբաստանյալ Լողման Ալի Հեսսիի նկատմամբ քրեական հետապնդում իրականացնելուց և դատարանին միջնորդել քրեական գործի վարույթը կարճել և քրեական հետապնդումը դադարեցնել։

Մեղադրողը հաշվի էր առել, որ ՀՀ քրեական օրենսգրքի 329-րդ հոդվածի 3-րդ մասը փոփոխվել է (ըստ դրա, հոդվածի գործողությունը չի տարածվում այն դեպքերի վրա, երբ Հայաստանի Հանրապետության Սահմանադրությամբ և Հայաստանի Հանրապետության օրենսդրությամբ վերապահված ապաստանի իրավունքից օգտվելու համար օտարերկրյա քաղաքացին կամ քաղաքացիություն չունեցող անձն առանց սահմանված փաստաթղթերի կամ առանց պատշաճ թույլտվության մուտք է գործում Հայաստանի Հանրապետություն), ինչպես նաև ՀՀ տարածքային կառավարման նախարարության միգրացիոն պետական ծառայության կողմից 2014թ. օգոստոսի 08-ին ընդունված «Լողման Ալիի Հեսսիին Հայաստանի Հանրապետությունում փախստական ճանաչելու և ապաստան տալու մասին»  որոշումը:

Ըստ այդ որոշման, Լողման Ալի Հեսսիի արարքում բացակայում է ՀՀ քրեական օրենսգրքի 329 հոդվածի 1-ին մասով նախատեսված հանցակազմը, որն էլ մեղադրանքից հրաժարվելու հիմք է հանդիսանում:

Դատարանը գտել է, որ պետք է Լողման Ալի Հեսսիի նկատմամբ քրեական գործի վարույթը կարճել և նրա նկատմամբ քրեական հետապնդումը դադարեցնել՝ մեղադրողի կողմից մեղադրանքից հրաժարվելու հիմքով: