Փաստ ինֆո

Քիչ առաջ Կոտայքի մարզի ընդհանուր իրավասության դատարանում մեկնարկեց Վարդան Պետրոսյանի նկատմամբ դատական հերթական նիստը:

Այսօր, ի տարբերություն նախորդ մի քանի նիստերի, դատարանում ներկա են նաև տուժողի իրավահաջորդները` վթարի հետևանքով զոհված երեխաներից մեկի ծնողները:

Դատական այսօրվա նիստին ներկա է նաև ՀՀ-ում Ֆրանսիայի դեսպանատան ներկայացուցիչը, ով հետևում է Ֆրանսիայի քաղաքացի Վարդան Պետրոսյանի նկատմամբ դատավարության ընթացքին:

Դատական նիստին ներկա են նաև հասարակական-քաղաքական գործիչներ:

Դատական նիստը մեկնարկեց Վարդան Պետրոսյանի պաշտպան Նիկոլայ Բաղդասարյանի հայտարարությամբ, որը վերաբերում էր դատական նախորդ նիստերից մեկում տուժողի ներկայացուցիչ Արթուր Հակոբյանի կողմից իր հասցեին արված վիրավորական արտահայտությանը:

Տուժողի իրավահաջորդի շահերի ներկայացուցիչ Ռուբեն Բալոյանն էլ միջնորդեց լրացուցիչ հարցաքննել Վարդան Պետրոսյանին` պատճառաբանելով, որ տուժողները, մասնավորապես` Արթուր Հակոբյանը, նախորդ նիստին ներկա չլինելով, զրկված է եղել Վարդան Պետրոսյանին հարցեր ուղղելու հնարավորությունից:

Վարդան Պետրոսյանի փաստաբաննն էլ առարկեց` հայտարարելով, որ իր վստահորդը ցուցմունք տալ չի ցանկանում:

Ինքը` Վարդան Պետրոսյանը, հայտարարեց. «Ես դահլիճում ասելու այլևս ոչինչ չունեմ, ես կպատասխանեմ Արթուր Հակոբյանի հարցերին` նայելով նրա աչքերի մեջ, վաղ թե ուշ ես մի օր դուրս եմ գալու և գնալու եմ նրանց մոտ»:

«Ինչպես հասկանանք, երկու երեխա սպանել է, ես այստեղ չեմ եղել, եկել սուտ հեքիաթները պատմել է ու չի ուզում մեր հարցերին պատասխանել»,- ասաց Արթուր Հակոբյանը:

Լսելով կողմերի կարծիքները` դատարանը որոշեց բավարարել միջնորդությունն ու տուժողներին հնարավորություն տալ հարցեր ուղղել Վարդան Պետրոսյանին:

Վերջինը, սակայն, հրաժարվեց դատարանում պատասխանել Արթուր Հակոբյանի հարցերին` դարձյալ խոստանալով բոլոր հարցերի պատասխանները տալ դատարանից դուրս:

«Արթուր, ես կպատասխանեմ քո հարցերին, բայց դրսում: Դատարանում քո տված հարցերն ուրիշ են լինելու, դրսում` ուրիշ»,- ասաց վարդան Պետրոսյանը: