Փաստ ինֆո

Սյունիքի արդեն նախկին մարզպետ Վահե Հակոբյանն այսօր կառավարության նիստին մասնակցում էր Ջրային պետական կոմիտեի պետի պաշտոնում:

Նիստից հետո լրագրողները Վահե Հակոբյանից փորձեցին ճշտել, թե ո՞ րն էր նրա անակնկալ ազատման պատճառը: Նա, սակայն, այս բնորոշման հետ չհամաձայնեց:  «Անակնկալ չէր: Եթե պետության իշխանությունները տեսնում են ինձ այս պաշտոնում, բնականաբար, ես էլ պիտի այդ գործառույթները կատարեմ»,- ասաց Վահե Հակոբյանը՝ հավելելով. «Մենք քաղաքական թիմ ենք, և խնդիրներն իրականացնում է քաղաքական իշխանությունը: Ղեկավարությունը որոշեց, որ իմ պարտականությունները շարունակեմ Ջրային պետական կոմիտեում»:

Լրագրողները փորձեցին ճշտել նաև, թե որքանով քաղաքական թիմիորոշումը Սյունիքի նոր մարզպետի նշանակման հարցում կհամընկնի հասարակության շրջանում տարածված այն լուրերի հետ, որ այդ պաշտոնում կվերանշանակվի Սյունիքի նախկին մարզպետՍուրիկ Խաչատրյանը:

«Իմ կարծիքով՝ մոտ ապագայում կնշանակվի Սյունիքի մարզպետ: Ես չէ, որ պիտի անուններ տամ, դա իմ որոշման տիրույթից դուրս է»,- ասաց Վահե Հակոբյանը՝ միաժամանակ ընդգծելով, որ ինքը տեղյակ չէ, թե մարզի բնակիչներն ում են ուզում տեսնել մարզպետի պաշտոնում:

Վահե Հակոբյանն անդրադարձավ նաև մամուլում տեղ գտած այն լուրերին, թե իրեն չի հաջողվել վերահսկել մարզը, իսկ Սյունիքում ԲՀԿ-ն մեծ տեղ է ունեցել:

Նա նախ չհերքեց դա, ապա վելացրեց. «Բնականաբար, որոշ աշխատանքներ ստացվել են, որոշ աշխատանքներ չեն ստացվել` օբյեկտիվ և սուբյեկտիվ պատճառներով: Բայց ես նվիրումով ու սիրով կատարել եմ իմ պարտականությունները»:

Լուսանկարը՝ Pan ARMENIAN Photo-ի