Փաստ ինֆո

«Եթե նախկինում ցանկացած հարցով դիմում էին Ազգային ժողովի Էթիկայի հարցերով հանձնաժողով, ապա այս տարիների ընթացքում նաև մեր հասարակությունը, այն մարդիկ, ովքեր շահագրգիռ են, մեր պատգամավորները, հասարակական կառույցները, որոնք այդ իրավունքն ունեն, հասկացան, որ Էթիկայի հանձնաժողովը դատարան չէ, այլ ընդամենն ունի որոշակի գործառույթներ, որոնց համար ձևավորվել է»,- «Փաստինֆո»-ի թղթակցին ասաց Էթիկայի հանձնաժողովի նախագահ Հովհաննես Սահակյանը՝ անդրադառնալով ԱԺ աշխատանքների վերաբերյալ օրերս հրապարակված մի վերլուծությանը: Դրանում, մասնավորապես, նշվել է, որ դիմումների հոսքն Էթիկայի հանձնաժողով նվազել է՝ դա կապելով վստահության գործոնի հետ:

Հ.Սահակյանը գտնում է, որ հակադարձելու խնդիր չկա, սակայն, «եթե նայենք ձևավորման առաջին փուլում ինչ բնույթի դիմումներով, պահանջներով էին դիմում հանձնաժողովին, ապա մեզ համար պարզ կդառնա, թե ինչու այս պահին այդ դիմումները նվազել են»: Ըստ նրա՝ նախկինում,  մասնավորապես, կարող էին դիմել անգամ անձնական խնդիրների հետ կապված:

«Հանձնաժողովն ընդամենը ԱԺ կանոնանկարգ-օրենքով իրեն վերապահված սահմանափակ թվով գործառույթներ իրականացնելու համար ձևավորված ժամանակավոր հանձնաժողով է, որը ձևավորվում է ԱԺ-ում ներկայացված խմբակցությունների անդամներից, և ժողովրդավարությունը ապահովելու համար նաև ռոտացիոն կարգով է ղեկավարվում: Հետևաբար՝ եթե կա մի ժամանակաշրջան, որ ակտիվ է և պասիվ է, դա ուղիղ համեմատական կարող է լինել նաև ընդդիմադիր հատվածը ներկայացնող նախագահության օրոք»,-նշեց Հ.Սահակյանը:

Ըստ նրա՝ ասվածի ապացույցը 2012 թ. մայիսի 31-ից մինչև 2014 թ. սեպտեմբերի 8-ը ՀՀ Ազգային ժողովի էթիկայի հարցերով ժամանակավոր հանձնաժողովի գործունեության վերաբերյալ կատարված վերլուծությունն է՝ կից հավելվածներով:

Մասնավորապես, համաձայն այդ վերլուծության` հանձնաժողովն իր գործունեության սկզբից ի վեր ստացել է 25 դիմում, կայացրել 33 որոշում:

Այդ թվում՝ հանձնաժողովի ոչ ընդդիմադիր նախագահողների՝ հանձնաժողովի նախագահի կամ նախագահի տեղակալի, օրոք ստացվել է 12 դիմում, կայացվել 19 որոշում: Ընդ որում՝ քննարկումը սկսելու վերաբերյալ կայացվել է 4, քննարկումը մերժելու վերաբերյալ՝ 8,  դիմումում բարձրացված հարցի քննությունը կարճելու վերաբերյալ՝ 4,  խախտումների վերաբերյալ ըստ էության՝ 2 որոշում: Ստացված 12 դիմումներից մեկը համարվել է մերժված:

Ընդդիմադիր նախագահողների օրոք պատկերն հետևյալն է.  13 դիմում, կայացված 14 որոշում, որոնցից 4-ը՝ քննարկումը սկսելու, իսկ 9-ը՝ քննարկումը մերժելու վերաբերյալ: Խախտումների վերաբերյալ ըստ էության կայացվել է մեկ որոշում:

Ի դեպ՝ հանձնաժողովի նախագահ Հ.Սահակյանն ընթացիկ նստաշրջանի համար առաջիկայում ձևավորվելիք հանձնաժողովի կազմում այլևս չի լինելու: Նա ԱԺ պետական-իրավական հարցերի հանձնաժողովի նախագահն է, և վերջինիս աշխատանքային ծանրաբեռնվածության պատճառով հրաժարվել է Էթիկայի հանձնաժողովում ներկայացված լինելուց:  

Այս պահին հայտնի է, որ ՀՀԿ-ն առաջադրելու է խմբակցության անդամ Արփինե Հովհաննիսյանի թեկնածությունը, սակայն չի բացառվում, որ խմբակցությունն օգտվի նաև մեկ այլ անդամ ունենալու իրավունքից:

Ինչպես «Փաստինֆո»-ն ավելի վաղ տեղեկացրել էր, Էթիկայի հանձնաժողովը կկազմավորվի նույն սկզբունքով, ինչ նախորդ նստաշրջանում գործողը, այն է՝ ընդդիմադիր և իշխանական խմբակցություններն ընդհանուր առմամբ կունենան հավասար թվով ներկայացուցիչներ, ևս մեկը կներկայացնի ոչ ընդդիմադիր և ոչ էլ իշխանական համարվող խմբակցությունը:

Այդուհանդերձ՝ կա մեկ տարբերություն. «Օրինաց երկիր»-ը վերջերս իրեն ընդդիմադիր է հայտարարել, ինչը նշանակում է, որ, եթե որևէ այլ խմբակցություն ևս չհրաժարվի ներկայացուցիչ ունենալուց, ապա ՀՀԿ-ն հանձնաժողովում պետք է ունենա նույնքան անդամ, որքան ընդդիմադիր ՀՅԴ-ն, «Ժառանգություն»-ը և «Օրինաց երկիր»-ը միասին, այն է՝ երեք ներկայացուցիչ: Մեկ ներկայացուցիչ կունենա այլընտրանք համարվող «Բարգավաճ Հայաստան»-ը:

Լուսանկարը՝ Ֆոտոլուրի