Փաստ ինֆո

Հայաստանի կանանց մեծ մասը տեղյակ չեն իրենց իրավունքներից և ցածր իրավագիտակցության մակարդակ ունեն: Այդ մասին այսօր լրագրողների հետ հանդիպմանն ասաց «Կանանց իրավունքների կենտրոն» հասարակական կազմակերպության հոգեբան Մարինե Մարտիրոսյանը:

«Կանանց իրավունքերի կենտրոնը» գործում է 1997թ. կենտրոնի ներկայացուցիչներն արձանագրում են, որ իրենց թեժ գծին ստացված զանգերի քանակն ավելացել է տարիների ընթացքում, սակայն, ըստ բանախոսների, դա պայմանավորված չէ բռնությունների թվի աճով, այլ կանայք այսօր ավելի շատ են իրենց մասին մտածում:

Կենտրոնի հոգեբանի խոսքով իրենց ավելի շատ դիմում են տարիներ շարունակ բռնության ենթարկված կանայք, զանգերի գերակշռող մասը ստացվում է բռնության ենթակված միջին տարիքի կանանցից:

Կենտրոնի կողմից մատուցվող թե՛ հոգեբանական և թե՛ իրավաբանական ծառայություններն ամբողջովին անվճարն են, ընդգծում է բանախոսն ու հավելում, որ երբ կինն է ենթարկվում բռնության, նա կարող է տարիներ շարունակ չբարձրաձայնել այդ մասին, սակայն, երբ նրա երեխաներն են ենթարկվում բռնության, նա չի կարող դա հանդուրժել:

Կենտրոնի իրավաբան Անաիդա Սիմոնյանն էլ իր հերթին նշեց, որ կենտրոն զանգահարած կինը հոգեբանական խորհրդատվության շնորհիվ ազատվում է բացասական հուզական վիճակներից, միայնության ու մեղքի զգացումից և ձեռք է բերում հոգեկան հավասարակշիռ վիճակ: Իսկ եթե անհրաժեշտություն կա  իրավաբանական խորհրդատվության, ապա կենտրոնի իրավաբաններն օգնում են նրանց վերականգնել խախտված իրավունքները, գործը դատարան հասնելու դեպքում էլ կենտրոնի իրավաբանները հանդես են գալիս որպես ներկայացուցիչ և պաշտպանում կնոջ շահերը:

Ինչ վերաբերում է վիճակագրական տվյալներին, ապա կենտրոնի թեժ գծին նախորդ տարվա ընթացքում և մայրաքաղաքից և մարզերից ստացվել է 1902 զանգ, որոնցից 759-ը ընտանեկան բռնության դեպքեր են, իսկ 8-ը՝ սեռական:

«Կանանց իրավունքների կենտրոն»-ի թեժ գծի հեռախոսահամարներն են՝ 52- 28 -28 կամ 0 800 80 850