Փաստ ինֆո

Երեկ Գյումրիում տեղի ունեցած ինքնասպանության դեպքի վերաբերյալ շրջանառող վարկածներից մեկը ինքնասպան եղած 51-ամյա Ս.Գ.-ի կողմից սեփական երեխաների նկատմամբ կատարված սեռական գործողություններն են:

Հիշեցնենք՝ տղամարդու դին կախված վիճակում գտել էին նրա հարազատները` եղբոր տան տանիքում:

Շրջանառող վարկածի իսկության մասին հարցով դիմեցինք Շիրակի մարզի դատախազ Րաֆֆի Ասլանյանին: Նա հայտնեց, որ նախաքննությունը ներկայում ստուգում է բոլոր հնարավոր վարկածները, բայց և չթաքցրեց, որ ինքնասպանություն գործած տղամարդու նկատմամբ Գյումրու ոստիկանությունում կա հարուցված քրեական գործ` ՀՀ քրեական օրենսգրքի 142-րդ հոդվածի, այն է` տասնվեց տարին չլրացած անձի նկատմամբ անառակաբարո գործողություններ կատարելու հատկանիշներով:

«Մոտ 10-15 օր առաջ այդ անձի հարևանուհին հաղորդում էր տվել ոստիկանություն այն մասին, որ նա իր երեխաների նկատմամբ սեռական ոտնձգություններ է կատարել»,- հայտնեց դատախազը՝ հիշեցնելով, սակայն, որ այս փաստը դեռ ապացուցված չէ, քանի որ գործի նախաքննությունը դեռ չի ավարտվել:

Ի դեպ, դատախազը հաստատեց նաև այն տեղեկությունները, որ դեպքի օրը, նախնական տեղեկություններով, ինքնասպանություն գործած տղամարդը հենց այս հարցի շուրջ է վիճաբանել իր կնոջ հետ:

Կինը սպառնացել է ամուսնուց հեռանալ, եթե պարզվի, որ նա իրոք սեռական գործողություններ է կատարել հարևանի 5-ամյա որդու նկատմամբ:

Բացի այդ, ըստ որոշ լուրերի՝ բազմազավակ ընտանիքի հայրը անառակաբարո գործողություններ է կատարել նաև իր 9-ամյա տղայի և 11-ամյա աղջկա նկատմամբ, որից հետո երեխաները տնից փախել և պատսպարվել են տատիկի տանը:

Ինքնասպան եղած Ս.Գ.-ն 4 երեխաների` 11- ամյա դստեր, 9, 1 տարեկան և նորածին  որդիների  հայր էր: