Փաստ ինֆո

Ազգային ժողովը քիչ առաջ վավերացրեց կրթության ոլորտին վերաբերող երկու՝ Հայաստանի Հանրապետության և Միջազգային զարգացման ընկերակցության միջև ու Հայաստանի Հանրապետության և Վերակառուցման ու զարգացման միջազգային բանկի միջև 2014 թվականի մայիսի 23-ին ստորագրված «Կրթության բարելավման ծրագիր» վարկային համաձայնագրերը:

Յուրաքանչյուր համաձայնագրով ՀՀ-ին կտրամադրվի 15 մլն ԱՄՆ դոլար գումարի չափով վարկ՝ 25 տարի մարման ժամկետով:

Նախատեսվում է բարեփոխումներ կատարել հանրակրթության ոլորտում, մասնավորապես առաջարկվում է վերակառուցել և արդիականացնել ավագ դպրոցները, բարձրացնել նախադպրոցական կրթության մատչելիությունը, ինչպես նաև աջակցել բարձրագույն կրթության բարեփոխումների իրականացմանը, իրականացնել ծրագրերի կառավարում, մոնիթորինգ և գնահատում:

Համաձայնագրերին կողմ քվեարկեց միայն ՀՀԿ խմբակցությունը: «Հայ ազգային կոնգրես»-ը, «Ժառանգությունը», ՀՅԴ-ն և «Օրինաց երկիր»-ը քվեարկեցին ձեռնպահ, իսկ «Բարգավաճ Հայաստան»-ը՝ դեմ:

Քվեարկությունից առաջ ՀԱԿ խմբակցության քարտուղար Արամ Մանուկյանը գործընկերներին կոչ արեց ձեռնպահ քվեարկել՝ պատճառաբանելով, որ թեպետ երկու վարկի նպատակը բարի է, այնուամենայնիվ, ելնելով այն հանգամանքից, որ Հայաստանի պետական պարտքն «անցնում է վտանգավոր սահմանը և բազմաթիվ են այն փաստերը, երբ վարկերն ուղղակիորեն մսխվում են և նպատակին չեն ծառայում»:

«Բարգավաճ Հայաստան» խմբակցությունը քանիցս ասել է, որ մեզ համար ընդունելի չէ մեր վարկային պարտավորությունններն անընդհատ և հետևողականորեն ավելացնելը, դրանով իսկ մեր արտաքին պարտքը հասցնելով «հոբելյանական»՝ 5 մլրդ-ի սահմանագծի: Այդ իսկ նկատառումից ելնելով «Բարգավաճ Հայաստան»-ը քվեարկում է դեմ»,-հայտարարեց խմբակցության քարտուղար Նաիրա Զոհրաբյանը: