Փաստ ինֆո

ՀՀ դատական դեպարտամենտի նախկին ղեկավար Միսակ Մարտիրոսյանի և մյուսների գործով այսօր սկսվեց դատաքննությունը: Դատարանի սահմանած ապացույցների հետազոտման կարգի համաձայն, հաջորդ դատական նիստում կսկսվի վկաների հարցաքննությունը, այդ փուլի ավարտից հետո կհետազոտվեն գործի գրավոր ապացույցները, ապա` կհարցաքննվեն ամբաստանյալները:

45 հատոր կազմող գործով ամբաստանյալներ են նախկին բարձրաստիճան պաշտոնյաներ՝ Դատական դեպարտամենտի  ղեկավար Միսակ Մարտիրոսյանը, Դատական կարգադրիչների ծառայության պետ Արմեն  Մովսիսյանը, ծառայության պետի տեղակալներ Գեղամ Գրիգորյանը և Գագիկ Խաչատրյանը, վերահսկողության բաժնի պետ Եղիազար Սարգսյանը, ֆինանսաբյուջետային բաժնի պետ - գլխավոր հաշվապահ Սաթենիկ Հովհաննիսյանը, անձնակազմի կառավարման բաժնի պետ Նարեկ Գասպարյանը, Լոռու մարզի ընդհանուր իրավասության առաջին ատյանի դատարանի դատական կարգադրիչների ծառայության ստորաբաժանման պետ Մերուժան Կյուրեղյանը, Երևանի Ավան և Նոր-Նորք վարչական շրջանների ընդհանուր իրավասության առաջին ատյանի դատարանի դատական կարգադրիչների ծառայության ստորաբաժանման պետ Բագրատ Արիկյանցը, ՀՀ վերաքննիչ քրեական դատարանի դատական կարգադրիչների ծառայության ստորաբաժանման պետ Արման Փալիկյանը, Կենտրոնական մարմնի ստորաբաժանման պետ Արմեն Ավագյանը, ինչպես նաև   պահեստապետ Յուրա Մուշկիդյանովը և  ՀՀ «Դատական դեպարտամենտ» ՊԿ հիմնարկի անձնակազմի կառավարման վարչության նախկին պետ Անգին  Ղուկասյանը:

«Փաստինֆո»-ն արդեն անդրադարձել է, մեղադրական եզրակացության բնորոշմամբ՝ «կազմակերպված խմբի կողմից» ՀՀ պետական բյուջեից որպես աշխատավարձ և դրամական այլ բավարարումներ փոխանցված գումարներից 2009 թվականի հուլիսից մինչև 2013 թվականի օգոստոսն ընկած ժամանակահատվածում  առանձնապես խոշոր չափերի` ընդհանուր 115.782.033 ՀՀ դրամ գումարի հափշտակության մեղադրանքին: Ներկայացնում ենք մեղադրական եզրակացության մի շարք այլ դրվագներ ևս:

Այսպես, ըստ մեղադրանքի, Գեղամ Գրիգորյանը՝ տեղեկանալով, որ 2009 թվականի օգոստոսին Մերուժան Կյուրեղյանը անձնակազմի կառավարման բաժին է ներկայացրել իր բարձրագույն կրթությունը հավաստող կեղծ դիպլոմի պատճենը, վերջինիս կողմից կեղծ փաստաթուղթ օգտագործելու դեպքին ընթացք չտալու համար, համոզելու եղանակով դրդել է նրան իր միջոցով ՀՀ հատուկ քննչական ծառայության պետին առանձնապես խոշոր չափերի` 1.206.330 ՀՀ դրամին համարժեք 3.000 ԱՄՆ դոլար  գումար կաշառք տալ, սակայն Մերուժան Կյուրեղյանն իր կամքից անկախ հանգամանքներով հանցագործությունն ավարտին չի հասցրել, քանի որ Գեղամ Գրիգորյանը վերջինիցս 2010 թվականի ապրիլ ամսին ստանալով նշված գումարը` խարդախության եղանակով հափշտակել է այն:

Մեղադրական եզրակացության մեջ տեղ են գտել նաև կաշառքի դրվագներ:  Այսպես, ըստ  մեղադրանքի, Միսակ Մարտիրոսյանը Միքայել Ստեփանյանին Լոռու մարզի ընդհանուր իրավասության առաջին ատյանի դատարանի գրասենյակում գործավարի պաշտոնում 1.000 ԱՄՆ դոլար կաշառքի դիմաց աշխատանքի ընդունելու շուրջ, ՀՀ «Դատական դեպարտամենտ» ՊԿ հիմնարկի անձնակազմի կառավարման վարչության նախկին պետ Անգին  Ղուկասյանի հետ նախնական համաձայնություն ձեռք բերելուց հետո` օգտագործելով իր պաշտոնեական դիրքը, նպաստել է արձակուրդում եղած ժամանակ իրեն պաշտոնում փոխարինող, դատական դեպարտամենտի ղեկավարի առաջին տեղակալ, դատարանների նախագահների խորհրդի քարտուղարի կողմից 2010 թվականի օգոստոսի 05-ի հրամանով Միքայել Ստեփանյանին պաշտոնի նշանակելուն: Դրանից հետո՝  վերադառնալով հերթական արձակուրդից՝ 2010 թվականի օգոստոսին, նախնական պայմանավորվածության համաձայն, դատական դեպարտամենտի վարչական շենքում Անգին Ղուկասյանից վերցրել է Միքայել Ստեփանյանին պաշտոնի նշանակելու համար վերջինիս մայրիկից  որպես կաշառք ստացված խոշոր չափերի` 366.780 ՀՀ դրամին համարժեք 1000 ԱՄՆ դոլարը:

Այնուհետև, Միսակ Մարտիրոսյանը 2010 թվականի նոյեմբերին Անգին Ղուկասյանի հետ նախնական համաձայնությամբ, նույն հիմնարկի աշխատակցուհու  եղբորորդուն՝ Արմեն Պետրոսյանին, դատական դեպարտամենտում ժամկետային աշխատանքային պայմանագրով աշխատանքի ընդունելու համար,  աշխատակցուհուց  Անգին Ղուկասյանի միջոցով որպես կաշառք ստացել է խոշոր չափերի՝ 361.400 ՀՀ դրամին համարժեք 1.000 ԱՄՆ դոլար, որից հետո՝ 2010 թվականի նոյեմբերի 10-ի հրամանով Արմեն Պետրոսյանի հետ կնքել է աշխատանքային պայմանագիր:

Դրանից հետո Միսակ Մարտիրոսյանը, ըստ մեղադրական եզրակացության,  2011 թվականի դեկտեմբերի 5-ի  հրամանով ՀՀ վարչական վերաքննիչ դատարանում որպես արխիվապահ աշխատանքի ընդունված Վիկտորյա Կարապետյանից իր աշխատասենյակում որպես կաշառք ստացել է 152.488 ՀՀ դրամին համարժեք 400 ԱՄՆ դոլար արժողությամբ ոսկե մետաղադրամ և 20.000 ՀՀ դրամ արժողությամբ 1 շիշ «Նապոլեոն» տեսակի կոնյակ: