Փաստ ինֆո

Ազգային ժողովի «Օրինաց երկիր» խմբակցությունն առաջարկում է հաջորդ քառօրյայի առաջին օրը՝ սեպտեմբերի 29-ին, ժամը 18.30-ին արտահերթ նիստ գումարել՝ ԴԱՀԿ-ի մասին օրենքում փոփոխություններ կատարելու նպատակով:

Այս մասին ԱԺ այսօրվա նիստում հայտարարեց ՕԵԿ խմբակցության անդամ Հովհաննես Մարգարյանը՝ հավելելով, որ ստորագրահավաքի ձաթուղթն իրենք բաժանել են բոլոր քաղաքական ուժերին:

Նա ընդգծեց, որ խմբակցությունը կողմ լինելով ԱԺ պատգամավորներ Արփինե Հովհաննիսյանի, Վահրամ Բաղդասարյանի և Հերմինե Նաղդալյանի հեղինակած «Դատական ակտերի հարկադիր կատարման մասին» օրենքում լրացումներ կատարելու մասին օրինագծին, կարևորում է նաև առանց դատարանի որոշման ԴԱՀԿ-ի կողմից քաղաքացիների գույքի, ունեցվածքի, հաշիվների վրա արգելանք դնելու և բռնագանձելու խնդրին ամբողջական լուծում տալու անհրաժեշտությունը:

Նշենք, որ ԱԺ-ի կողմից նախօրեին առաջին ընթերցմամբ քննարկված «Դատական ակտերի հարկադիր կատարման մասին» օրենքում լրացումներ կատարելու մասին հանրապետական պատգամավորների հեղինակած օրինագիծն այսօր ընդունվեց միաձայն:

Ըստ այդմ, սահմանվում է, որ պարտապանի հաշիվները սպասարկող բանկը կամ այլ վարկային կազմակերպությունը  պարտավոր է պարտապանի դրամական միջոցների վրա արգելանք դնել միայն այն չափով, որը նշված է հարկադիր կատարողի որոշման մեջ: Այս պահանջի չպահպանման դեպքում պարտապանի հաշիվները սպասարկող բանկը կամ այլ վարկային կազմակերպությունը պարտավոր է փոխհատուցել պարտապանին պատճառված իրական վնասը և բացթողնված օգուտը:

Այսպիսով կբացառվեն այն դեպքերը, երբ հաճախորդի հաշիվը սպասարկող բանկը կամ վարկային կազմակերպությունը, ստանալով հաճախորդի դրամական միջոցների վրա արգելանք դնելու որոշումը, հաճախորդի դրամական միջոցների վրա արգելանք է դնում ոչ թե որոշման մեջ նշված չափով, այլ՝ հաճախորդի հաշվում գտնվող բոլոր դրամական միջոցների նկատմամբ՝ սահմանափակելով սեփականատիրոջ իրավազորությունների իրականացման հնարավորությունները: