Փաստ ինֆո

«Ժողովուրդ»-ը գրում է, որ սեպտեմբերի 9-ին Արարատի մարզի Այգեստան գյուղում հանցագործը կամ հանցագործները սպանել, թալանել և չի բացառվում նաև՝ բռնաբարել են ազատամարտիկի քրոջը:

Ըստ ոստիկանության պաշտոնական հաղորդագրության՝ դեպքը տեղի է ունեցել սեպտեմբերի 8-ից 9-ն ընկած ժամանակահատվածում: Անհայտ անձը (կամ անձինք) տան ննջասենյակում սպանել է 1958թ. ծնված Հերմինե Գրիգորյանին:

Սպանվածի եղբոր խոսքերով՝շատ դաժան են վարվել քրոջ հետ. «Մերկ վիճակում գցել են գետնին, ինչքան դոշակ, վերմակ կար գցել էին վրան: Ամբողջ գյուղին տանում-բերում են ոստիկանություն, սկսած ինձնից տարել են, մատնահետքերը վերցրել են: Մի խոսքով, լուրջ զբաղվում են»,- պատմել է Ռուբենը՝ հայտնելով, որ քրեագետների նախնական եզրակացությամբ՝ մարդասպանը Հերմինեին սպանել է ձախ ձեռքով:

Լրատվամիջոցի հետ զրույցում Այգեստան համայնքի ղեկավար Սոկրատ Հովսեփյանն ասել է, որ սպանված Հերմինեն ազատամարտիկի քույր էր:

Գյուղապետի պատմելով՝ Հերմինեի ընկերուհին առավոտյան ձայն է տվել նրան, սակայն երբ որևէ պատասխան չի ստացել, դիմել է հարևաններին, որ օգնեն՝ հասկանալու, թե որտեղ է Հերմինեն. «Տան դարպասի դռները փակ են եղել և հարևանի տղաները՝ Սուրենը ու Սենիկը, պատից թռել են տուն և մտնելով ներս՝ տեսել են ամեն ինչ խառը վիճակում է: Հերմինեն գետնին ընկած է եղել, ահագին շորերը վրան գցած, գիշերային շալվարը հագից հանած, մի կողմ գցած: Բռնության հետքեր են եղել վրան: Հաստատ նրա ձեռքերը կապած են եղել: Մի խոսքով, շատ դաժան են վարվել նրա հետ»,- պատմել է Հերմինեի ընկերուհին:

Հոդվածն ամբողջությամբ կարող եք կարդալ «Ժողովուրդ» օրաթերթի` 11.09.2014թ. համարում: