Փաստ ինֆո

«Ժողովուրդ»-ը գրում է, որ իրենց հայտնի են դարձել օգոստոսի 26-ին «Շարլոտ» գիշերային ակումբում ծեծի մասնակից հարկային ծառայողների անունները:

Ինչպես թերթն է ներկայացնում, միջադեպը տեղի էր ունեցել կեսգիշերին մոտ: Ըստ տարածված տեղեկությունների՝ միջադեպի մասնակիցները հարկային տեսչության բարձրաստիճան պաշտոնյաներ են: Դեպքից հետո տեղեկություններ տարածվեցին, թե սեպտեմբերի 4-ին աշխատանքից ազատվել է Կենտրոնի հարկային տեսչության պետ Կարեն Կարապետյանը, ինչպես նաև ԱԱԾ աշխատակից Արսեն Ղազարյանը: Ենթադրվում է, որ նրանց ազատման հրամանը կապված է ակումբում տեղի ունեցած ծեծկռտուքի հետ:

Ըստ լրատվամիջոցի տեղեկությունների՝ «Շարլոտ» գիշերային ակումբի սեփականատերերից մեկը, ով նախկին ոստիկան է, դեպքի օրը որոշել է ընկերոջ հետ հաց ուտել իրեն պատկանող ակումբում, որտեղ երկար ժամանակ չի եղել:

Մի փոքր ուշ ակումբ են այցելել մի խումբ երիտասարդներ՝ ակնհայտ ցինիկ պահվածքով, ու տարօրինակ հայացքով նայել ակումբի սեփականատիրոջն ու նրա ընկերոջը, ինչը դուր չի եկել նախկին ոստիկանին: Ի պատասխան ակումբի սեփականատիրոջ  հարցին՝ տղաներից մեկն ասել է, թե իրենք ակումբը փակել էին տվել և իրենցից բացի, նշված ժամին ոչ ոք չպետք է մտներ այնտեղ: Ակումբի սեփականատերն էլ ասել է, թե իրենք կարճ ժամանակով են մտել, շտապ հաց կուտեն և դուրս կգան՝ չխանգարելով իրենց խրախճանքին: Այս պատասխանը, սակայն, չի գոհացրել տղաներին:

Ինչպես թերթն է ներկայացնում, մի քանի րոպե անց Ֆինանսների նախարարության աշխատակիցներն առանց որևէ բան ասելու, հաց ուտելու պահին հարձակվել են ակումբի սեփականատիրոջ և նրա ընկերոջ վրա ու սկսել ծեծել: Նախկին ոստիկանը զանգահարել է իր փոքր եղբորը, ով ակումբի տնօրենն է և հայտնել, որ շտապ գա, կարգի հրավիրի ակումբում հաստատված «բեսպրեդելը»: Սակայն ակումբի տնօրենը, երբ ներս է մտել ու տեսել, թե ում հետ է իր եղբայրը ծեծկռտուք սարքել, խիստ զարմացել է և հորդորել է մեծ եղբորը կատարվածը «կուլ տալ» և հեռանալ ակումբից: Սակայն ծեծի ենթարկված նախկին ոստիկանն ասել է. «Ես սա կուլ տվողը չեմ», ապա որոշել է դաս տալ իրենց ամենակարող համարող երիտասարդների խմբին:

Արդյունքում՝ նախկին ոստիկանը եղբորը դուրս հանելով ակումբից, այնտեղ է կանչել մի խումբ տղաների, կողպել ակումբի դուռը, սկսել մի լավ «դաս տալ» երիտասարդների խմբին, որոնց մեջ են եղել ՀՀ ֆինանսների նախարար Գագիկ Խաչատրյանի եղբորորդին` Կարեն Խաչատրյանը, ով ՀՀ մաքսատան բաժնի պետ է, նրան ուղեկցող Կենտրոնի հարկային տեսչության պետ Կարեն Կարապետյանը, ով «Մետելիցա» ռեստորանի սեփականատերն է, ՀՀ վարչապետ Հովիկ Աբրահամյանի խորհրդական Կովալենկո Շահգալդյանի փեսայի աներորդին: Այնտեղ են եղել նաև ՖՆ մաքսանենգության վարչության աշխատակից Սուրենը, ով ԱԺ նախկին պատգամավոր Լևոն Սարգսյանի՝ Ալրաղացի Լյովիկի քրոջ տղան է, ինչպես նաև՝ ՊԵԿ նախագահի նախկին տեղակալներից մեկը, ում անունը լրատվամիջոցն այդպես էլ չի կարողացել պարզել:

Հոդվածն ամբողջությամբ կարող եք կարդալ «Ժողովուրդ» օրաթերթի` 10.09.2014թ. համարում: