Փաստ ինֆո

Գյումրիի նախկին քաղաքապետի եղբորորդի Վահե Ղուկասյանի պաշտպան Հայկ Ալումյանը բողոք է  ներկայացրել Վերաքննիչ դատարան՝ ընդդեմ առաջին ատյանի դատարանի դատավճռի, որով Վ.Ղուկասյանը դատապարտվել էր 17 տարվա ազատազրկման: Մեղադրողներն իրենց մեղադրական ճառում միջնորդել էին Վ.Ղուկասյանին դատապարտել 22 տարվա ազատազրկման:
 
Ինչպես «Փաստինֆո»-ի թղթակցին հայտնեց Հայկ Ալումյանը, ինքը վերաքննիչ բողոքում միջնորդում է բեկանել դատավճիռը և իր պաշտպանյալին արդարացնել մեղադրանքի երկու հոդվածներում՝ ՀՀ քրեական օրենսգրքի 104-րդ հոդվածի 1-ին մասով՝ սպանություն, և  34-104-րդ հոդվածի 2-րդ մասի 6-րդ կետով՝ շատերի կյանքի համար վտանգավոր եղանակով սպանության փորձ:

Ըստ պաշտպանի,  Գյումրիում «Շեկո» մականունով առավել հայտնի Արտյոմ Կարապետյանն է առաջինը կրակել, Վահե Ղուկասյանն ընդամենը պատասխան կրակ է արձակել:

Մեղադրանքի ևս մեկ հոդվածի մասով՝ ՀՀ քրեական օրենսգրքի 235-րդ հոդվածի 1-ին մասով՝ ապօրինի զենք կրելը, պաշտպանը բողոք չի ներկայացրել:  

Ըստ մեղադրանքի` Վահե Ղուկասյանը 2013թ. ապրիլի 23-ի առավոտյան, ապօրինի կերպով ձեռք բերված և իր մոտ պահվող հրազենով փորձել էր շատերի կյանքի համար վտանգավոր եղանակով, ապօրինաբար դիտավորությամբ կյանքից զրկել Հարություն Խաչատրյանին, սակայն իր կամքից անկախ հանգամանքներով չէր կարողացել հանցագործությունն ավարտին հասցնել: Այնուհետև ապօրինաբար դիտավորությամբ կյանքից զրկել էր Արտյոմ Կարապետյանին, ով Գյումրիում առավել հայտնի է «Շեկո» մականունով։

Զինված միջադեպը տեղի էր ունեցել «Քավոր Հարութ»-ի` Հարություն Խաչատրյանի տան մոտ։

Լուսանկարը՝ Aravot.am-ի