Փաստ ինֆո

Քրեական հեղինակություն Թևոսիկի եղբոր սպանությունը պատվիրելու և այն իրականացնողին սպանելու համար մեղադրվող Իսրայել Սարգսյանի փաստաբանն սպասում է Վճռաբեկ դատարանի պատասխանին, որպեսզի, սպառելով ներպետական դատական ատյանները, դիմի Մարդու իրավունքների եվրոպական դատարան: Այս մասին փաստաբան Արսեն Սարդարյանն ասաց «Փաստինֆո»-ի հետ զրույցում` հավելելով, որ կալանքը որպես խափանման միջոց ընտրելու մասին դատարանի որոշումը զուրկ է իրավական հիմքից:

«Ես ինչ ներգրավվել եմ որպես պաշտպան, առաջին իսկ կալանքի նիստին ներկա գտնվելով՝ տեսել եմ, որ անձին անհիմն կալանավորում են, ու առաջին ատյանում կայացած կալանքի նիստից հետո մտահղացումը ծագեց, որ պարտադիր պետք է դիմել ԵԴ»,- ասաց փաստաբանը:

Հիշեցնենք՝ Իսրայել Սարգսյանը կալանավորվել էր 2014թ. փետրվարին: Վերջին անգամ կալանքը 2 ամսով երկարացնելու որոշում է կայացվել օգոստոսի 3-ին: Մեր հարցին, թե ի՞նչ սպասումներ ունի փաստաբանը, արդյոք հոկտեմբերի 3-ից հետո կալանքը դարձյալ կերկարացվի՞, Արսեն Սարդարյանը պատասխանեց. «Տրամաբանությունը հետևյալն է. եթե մի անգամ առանց որևէ հիմքի երկարացնում են, ինչո՞ւ պիտի էլի չերկարացնեն: Այսինքն` այս անտրամաբանությամբ շարժվելով՝ տրամաբանական է ստացվում, որ կերկարացնեն»:

Արսեն Սարդարյանը նաև հիշեցրեց, որ համաձայն ՀՀ Քրեական դատավարության օրենսգրքի՝ անձը մինչդատական վարույթում կալանքի տակ կարող է պահվել 1 տարի:

«Այսինքն` մեկ տարին լրանալուց հետո գործը մեղադրական եզրակացությամբ կա'մ պետք է ուղարկվի դատարան, կա'մ մարդը պետք է ազատ արձակվի»,- ասաց փաստաբանն ու ներկայացրեց դեպքերի զարգացման սեփական կանխատեսումը:

«Որ գործը կուղարկվի դատարան, չեմ կարծում, թեև չեմ էլ բացառում, որովհետև եթե օրենքի տառից ենք ելնում, ապա Իսրայելին վաղուց պետք է ազատած լինեին, իսկ եթե նայում ենք իրականությանը, որն այսօր կատարվում է իրավապահ մարմիններում` նախաքննության փուլում, ապա չենք կարող բացառել, որ նման կամայականությունը կշարունակվի: Ամեն դեպքում, մենք լավատեսորեն ենք տրամադրված և սպասում ենք, որ պետք է կարճեն գործը»,-ասաց փաստաբանը:

Իսկ թե ո՞րն է իր լավատեսության հիմքը, Արսեն Սարդարյանը հրաժարվեց բացահայտել` հիշեցնելով, որ ապրիլին, երբ քրեական գործի նախաքննությունը ոստիկանությունից փոխանցվեց ՀՀ ազգային անվտանգության ծառայության քննչական վարչություն, նոր նախաքննական մարմինը փաստաբաններից նախաքննական գաղտնիքը չբացահայտելու ստորագրություն է պահանջել:

«Ոստիկանությունը հրապարակեց, չգիտես ինչ ձևով սարքած, մարդուն արատավորող, անմեղության կանխավարկածը խախտող տեսանյութ: Իրենք, կարելի է ասել, իրենց բոլոր սկզբունքները խախտեցին, բայց մենք, այնուամենայնիվ, մնում ենք նորմին հավատարիմ»,- ասաց Արսեն Սարդարյանը և հավելեց. «Արդյունքում ստացվում է, որ միցակցություն չկա, հակառակը` մարդու իրավունքները ամեն կերպ ոտնահարվում են, բայց մենք որևէ կերպ չենք կարողանում պաշտպանվել: Եվ որ ամենատարօրինակն է, այդ ամենը, կարելի է ասել, արվում է օրենքով»:

Հիշեցնենք՝ դեպքի առիթով քրեական գործը դեռ նոր էր հարուցվել, երբ ոստիկանությունը հայտարարեց, որ սպանությունը կատարել է Մովսես Ներսիսյանը` Իսրայել Սարգսյանի պատվերով, իսկ սպանությունը կատարելուց հետո պատվիրատուն, ըստ ոստիկանության, սպանել է Մովսես Ներսիսյանին և թաքցրել նրա դին Քանաքեռավանի կոյուղու դիտահորում:

Հեռուստատեսությամբ անգամ այդ մասին պատմող տեսանյութ հեռարձակվեց: Բայց դիակի որոնողական աշխատանքներն այդպես էլ արդյունք չտվեցին:

Փոխարենը լուրեր տարածվեցին, որ փորձաքննությունը հաստատել է, որ դիակը կարող էր անցած ամիսների ընթացքում ի սպառ քայքայված լինել: