Փաստ ինֆո

Մորը ծեծելով սպանելու մեջ մեղադրվող Արմեն Չիլինգարյանն այսօր դատարանում հայտարարեց, որ զղջում է կատարվածի համար և խնդրեց  ներել իրեն:

Ավան և Նոր Նորք վարչական շրջանների ընդհանուր իրավասության դատարանի այսօրվա դատական նիստում հրապարակվեցին ամբաստանյալի նախաքննական ցուցմունքները:

Հիշեցնենք, որ նախորդ դատական նիստում ամբաստանյալը ցուցմունք էր տվել և առկա էական հակասությունների պատճառով մեղադրողը միջնորդել էր հրապարակել նրա նախաքննական ցուցմունքները:

Որպես կասկածյալ տված ցուցմունքներում ամբաստանյալը հայտնել էր, որ մայրը ընկել է լոգարանում, իսկ ինքը փորձել է օգնել` նրան տեղափոխել  ճաշասենյակ և հարևանների միջոցով շտապ օգնություն կանչել: Ամբաստանյալը նշել էր նաև, որ դեպքի օրը տանը միայն ինքն ու  մայրն են եղել` պնդելով, թե մոր հետ չի վիճաբանել,  մորը,  կնոջն ու երեխաներին երբեք ծեծել, և թե մայրն այդ վնասվածքները ստացել է ընկնելու հետևանքով:

Սակայն ամբաստանյալը հետագայում հրաժարվել է այս ցուցմունքներից և նախաքննական մարմնին հայտնել, որ դեպքի  օր գնացել էր երեխաններին տեսության, քանի որ իր հարբեցողության պատճառով կինը երեխաների հետ հայրական տուն էր տեղափոխվել:  Կինը թույլ չի տվել տեսակցել երեխաներին եւ ինքը զայրացած տուն է վերադարձել` ճանապարհին գնելով օղի ու ձուկ: Տանը օղի է խմել,  իսկ մորն էլ  խնդրել, որ ձուկը պատրաստի, եւ պատմել է, որ կինը թույլ չի տվել տեսակցել երեխաներին, ինչին ի պատասխան մայրն ասել է «խմած ես եղել, դրա համար էլ թույլ չի տվել»:

Ձուկը պատրաստելու համար մայրը պատրաստվել է գնալ խանութ` ձեթ գնելու, ինչի մասին իմանալով որդին  խնդրել է նաեւ մեկ շիշ օղի գնել իր համար, ինչին ի պատասխան մայրը նրա ասել է «ալկաշ»: Այս բառից ավելի զայրանալով` որդին հարվածել է մորը, իսկ երբ վերջինս վայր է ընկել, նստել է նրա կրծքավանդակին ու շարունակել հարվածել մորը, մազերից բռնել ու քաշքշել:

Հարվածները դադարեցվել են այն պահին, երբ նրանց վերևի հարևանը լսել է ամբաստանյալի ձայնն ու պատուհանին մոտենալով ասել` «ինչ է ձայնդ, Արմեն…» :

Սպանված կնոջ որդին հայտնել էր նաև, որ հարվածներից հետո մոր քթից ու բերանից արյուն է հոսել, ապա` մորը քաշելով տարել է ճաշասենյակ և պառկեցրել  բազմոցին,  մայրը չի կարողացել շնչել,  խռխռացրել է,  վախեցել է և վազել  հարևանի տուն` օգնություն խնդրել, շտապ օգնությունն էլ արձանագրել է, որ մայրը մահացել է:

Ամբաստանյալը նաև չհերքեց, որ միջանցքի, ննջասենյակի հատակին թափված արյունն ինքն է  մաքրել` ջրի,  ծածկոցի և այլ շորերի միջոցով:

Ըստ ցուցմունքի՝  ամբաստանյալը մորը բազմիցս է ծեծել,  որոնց հետեւանքով մայրը նաեւ մարմնական վնասվածքներ է ստացել, այդ թվում՝ կոտրվածք:

Ամբաստանյալը նաև նշել է,  որ մայրը երեք չի ասել որևէ մեկին, որ որդին իրեն ծեծի է ենթարկում:

Թե քանի անգամ է ամբաստանյալը հարվածել մորը՝ չէր հիշում, սակայն պնդեց, որ ինքը մորը այդ վիճակում տեսնելով վախեցել է: 

Պաշտպանի հարցին էլ  պատասխանեց, թե  չի գիտակցել, որ մորն սպանել է` հայտարարելով, որ  նման դիտավորություն չի ունեցել: Այդուհանդեձ դատարանում ամբաստանյալը լիարժեք չպատասխանեց, թե որ ցուցմունքն է ճիշտ` նախաքննակա՞ն, թե՞ դատաքննական:

Ամբաստանյալի ցուցմունքների հետազոտմամբ ավարտվեց գործով դատաքննությունը եւ դատարանն անցավ դատական վիճաբանությունների փուլին:

Հաջորդ՝ սեպտեմբերի 24-ին կայանալիք նիստում մեղադրող դատախազը հանես կգա մեղադրական ճառով: