Փաստ ինֆո

Սահմանադրական բարեփոխումների մասնագիտական հանձնաժողովի անդամների վերջնական ընտրությունը կանգ է առել խորհրդարանական կառավարման ձևի վրա:

Այս մասին այսօր լրագրողների հետ հանդիպմանը հայտարարեց հանձնաժողովի անդամ, ՀՀ արդարադատության նախկին նախարար Գևորգ Դանիելյանը՝ հավելելով՝ խորհրդարանական կառավարման ձևն ուղղակիորեն ենթադրում է համամասնական համակարգ:

Առայժմ այլընտրանքը պահպանվում է դատական համակարգի երկաստիճան կամ եռաստիճան համակարգի հարցում: Գ.Դանիելյանը նշեց, որ հանձնաժողովի անդամների մեծամասնությունն առավել հիմնավորված է համարում դատական իշխանության եռաստիճան համակարգը, սակայն հանձնաժողովում կան անդամներ, ովքեր երկաստիճան համակարգի կողմակիցներ են:

Գ.Դանիելյանը հավելեց նաև, որ այս հարցի առնչությամբ Վենետիկի հանձնաժողովի հետ արդեն քննարկումներ եղել են, Վենետիկի հանձնաժողովը գտնում է, որ մասնավորապես, քրեական ու քաղաքացիական գործերով ճիշտ է պահպանել եռաստիճան համակարգը: Գ.Դանիելյանն իր հերթին  գտնում է, որ դատական համակարգը պետք է լինի կայուն, քանի որ փոփոխությունները չեն կարող հանգեցնել համակարգի արդյունավետությանը:

Մասնագետը նշեց նաև, որ հանձնաժողովը հանգել է եզրակացության, որ բարեփոխված Սահմանադրությունում կարելի է նախատեսել երդվյալ ատենակալների ինստիտուտը, տարեկան 30 գործ կլինի, որոնցով երդվյալ ատենակալների  մասնակցության անհրաժեշտություն կլինի:  

Մասնագիտական հանձնաժողովը նախատեսել է նաև, որ այս կամ այն միջազգային կազմակերպությանն անդամակցելու դեպքում քաղաքական ուժերը, ինչպես նաև քաղաքացիական նախաձեռնությունները հնարավորություն ունենան Հայաստանի ինքնիշխանության սահմանափակման մտավախության դեպքում հարցին լուծում տալ հանրաքվեի միջոցով:   

Գ.Դանիելյանը համամիտ չէ ընդդիմադիր քաղաքական ուժերի այն դիրքորոշման հետ, թե սահմանադրական բարեփոխումների գործընթացը նախաձեռնվել է իշխանության վերարտադրման համար. ճիշտ հակառակը՝ սահմանադրական բարեփոխումները դժվարացնում են իշխանության վերարտադրումը:  

ՀՀ Սահմանադրության բարեփոխումների հայեցակարգի հանրային քննարկումները, ըստ Գևորգ Դանիելյանի, ընդհանուր առմամբ արդյունավետ էին, բայց հանձնաժողովի անդամները լուրջ վերապահումներ ունեն այդ կապակցությամբ՝ չարդարացան շատ ավելի խորն ու ընդգրկուն  քննարկումների վերաբերյալ իրենց սպասելիքները:

Միաժամանակ մասնագիտական հանձնաժողովի անդամը հերքեց այն տեսակետը, թե քաղաքական ուժերը չեն մասնակցել քննարկումներին:

Սեպտեմբերի 16-ին, մասնավորապես, «Ժառանգություն» կուսակցությունը հրավիրել է քննարկումներ Հայեցակարգի շուրջ: Այն, որ հանձնաժողովը քաղաքական ուժերից ու այլ կազմակերպություններից ստացել է 200-ից ավելի առաջարկություններ, չի խոսում պասիվության մասին: «Քաղաքական քննարկումներ դեռ կլինեն»,- ասաց Գ.Դանիելյանը:

«Առաջարկությունների մեծամասնությունը հաշվի կառնվի-, ասաց մասնագետը,-շատ հաճախ  խմբագրական փոփոխություններ են առաջարկվում,  ինչը նույնպես շատ կարևոր է»:

Գ.Դանիելյանը նշեց, որ մի ստվար հատված առաջարկում է ՏԻՄ մարմինների պաշտոնազրկման մեխանիզմի հարցը:

Գևորգ Դանիելյանը հայտնեց, որ օրեր առաջ՝ սեպտեմբերի 4-ին, լրացավ հանձնաժողովի ստեղծման մեկ տարին: Այդ ընթացքում մշակվել ու հանրային քննարկման է ներկայացվել Հայեցակարգը՝ և  մասնագիտական լսարանի, և թե հանրության լայն շրջանակների առջև: Սեպտեմբերի 19-ին, 20-ին, 21-ին Փարիզում հանդիպումներ տեղի կունենան Վենետիկի հանձնաժողովի հետ, ապա ՀՀ նախագահին կներկայացվի Հայեցակարգի վերջնական տարբերակը: