Փաստ ինֆո

54 և 57-ամյա երևանցի 2 տղամարդ համակարգչով իրենց տանը կեղծ փողեր են տպել ու Երևանի, ՀՀ մարզերի և նույնիսկ ԼՂՀ տարբեր բնակավայրերի խանութներից գնումներ կատարելով՝ փորձել իրացնել սեփական կեղծ արտադրանքը:

Բայց 2013թ. մայիսի 21-ին՝ Գորիս քաղաքի Անկախության փողոցի «փակ շուկա»-ի մոտ նրանց հանցավոր գործունեությունն ավարտվել է:

Այդ օրը ոստիկանության Սյունիքի մարզային վարչության Գորիսի բաժնի աշխատակիցները, կեղծ փողեր պահելու և իրացնելու կասկածանքով Արային ու Ռաֆայելին բերման ենթարկելով, նրանց մոտ հայտնաբերել և առգրավել են 540 000 ընդհանուր արժեքով 20 000 և 100 000-անոց կեղծ թղթադրամներ:

Դեպքի առթիվ ՀԿԳ քննության վարչությունում հարուցված քրեական գործի նախաքննությամբ ավելի ուշ պարզվել էր, որ  Արան ֆինանսական սղության պատճառով 2009թ. մինչև 2013թ. մայիսի 21-ն ընկած ժամանակահատվածում, իր վարձակալած երևանյան բնակարանում սկանավորման միջոցով համակարգչում ներբեռնված իսկական 1.000, 5.000, 10.000, 20.000, 50.000 և 100.000 ՀՀ դրամ անվանական արժեքներով թղթադրամները, համակարգչային «Ֆոտոշոփ» և «Քորալ» ծրագրերի միջոցով մշակել, տեսքն ու ձևը հնարավորինս համապատասխանեցրել է իսկականին, ապա կեղծ փողերի սերիան և համարները փոխելով՝ գունավոր տպիչով տպել և իրացնելու նպատակով պատրաստել է կեղծ թղթադրամներ:

Կեղծ փողերը պատրաստ լինելուց հետո Արան դրանք կիսել է Ռաֆայելի հետ, և նրանք սկսել են իրենց շրջագայությունը ՀՀ մարզերում ու ԼՂՀ-ում` իրավապահների աչքից հեռու դրանք իրացնելու նպատակով` պայնամավորվերով հետագայում կիսել ապօրինի «բիզնեսից» ստացվող եկամուտները:

Դրա համար նրանք տարբեր խանութներում գնումներ են կատարել, վճարել 20 և 100 հազարանոց կեղծ թղթադրամներով և առևտրի արդյունքում ստացել արդեն իրական փողեր:   

Նախաքննությամբ պազվել է, որ այս եղանակով, նրանց հաջողվել է իրացնել 3.061.000 ՀՀ դրամ ընդհանուր արժեքով կեղծ գումար, որից 1.581.000-ը Արան գործով չպարզված հանգամանքներում իրացրել է անձամբ, 940.000-ը Ռաֆաել Ավագյանի հետ իրացրել են ՀՀ Սյունիքի մարզում և ԼՂՀ-ում, իսկ 540.000-ը նրանց չէր հաջողվել իրացնել, քանի որ այն հայտնաբերվել էր նրանց բերման ենթարկելիս կատարված խուզարկության ժամանակ:

Քրեական գործի նախաքննությունն արվարտվել է, գործն ուղարկվել է դատարան: Բայց կեղծ փողերի այս պատմությունն այսքանով չի ավարտվում:

Բանն այն է, որ 2014թ. ապրրիլի 16-ին, որոշում է կայացվել մայր գործից անջատել մաս` ինքնությունը չպարզված անձանց կողմից կեղծ փողեր իրացնելու վերաբերյալ:

Մեր ունեցած հավաստի տեղեկություններով՝ գործից անջատված մասը վերաբերում է 10.000, 20.000 եւ 100.000 կեղծ թղթադրամների շրջանառության նոր դրվագներին, որոնց քննությունն իրականացնում է Հատկապես կարեւոր գործերի քննչական վարչությունը: Վերջերս նոր դրվագներ են բացահայտվել եւ գործի նախաքննությունը վերսկսվել է: