Փաստ ինֆո

«Էլի գորշ մեծամասնության վախկոտությունը կաշկանդեց իրեն՝ գնալու բացախոսության, քննարկումների»,-«Փաստինֆո»-ի թղթակցին ասաց Ազգային ժողովի «Հայ ազգային կոնգրես» խմբակցության քարտուղար Արամ Մանուկյանը՝ անդրադառնալով քաղաքական մեծամասնության կողմից արտագաղթի վերաբերյալ լսումներ կազմակերպելու մասին քառյակի առաջարկն այսօր անարձագանք թողնելուն:

Ազգային ժողովի` այսօր մեկնարկած աշնանային նստաշրջանի առաջին նիստում «Հայ ազգային կոնգրես» խմբակցության ղեկավար Լևոն Զուրաբյանը քառյակի անունից պահանջել էր անհապաղ հրավիրել խորհրդրանական լսումներ՝ «ամենաճակատագրական, անհետաձգելի» մի հարցի, այն է՝ արտագաղթի վերաբերյալ:

Նա նշել էր, որ Հայաստանից, համաձայն պաշտոնական վիճակագրության, 2008-2013 թթ. հեռացել է 212 հազար մարդ: «Երկրի քաղաքական ուժերը պարտավոր են բաց քննարկումներ սկսել արտագաղթի մասին»,- ընդգծել էր նա:

Խմբակցության քարտուղար Արամ Մանուկյանն էլ նույն հարցի կապակցությամբ ԱԺ նիստում հայտարարել էր, որ խորհրդարանը պարտավոր է իմանալ Հայաստանում ընթացող ժողովրդագրական գործընթացների մասին:

«Սա կարող է լինել լրիվ բաց, կարող է լինել փակ», -ասել էր նա՝ ընդգծելով, որ «հարցի քննարկումը թիվ մեկ մարտահրավերն է այսօրվա վիճակի համար»:

«Մի բան հստակ է. ես ունեմ հիմնավոր մատուցելիք նյութ: Մենք ունենք աշխատանքային խումբ, որը համադրել է Հայաստանից արատագաղթի վերաբերյալ մի շարք կառույցների, այդ թվում՝ Համաշխարհային բանկի, Արժույթի միջազգային հիմնադրամի,  ՄԱԿ-ի գրասենյակի, Սլավոնական համալսարանի ուսումնասիրությունները»,- «Փաստինֆո»-ի թղթակցին ասաց Ա.Մանուկյանը՝ հավելելով, որ, բացի այդ, տարիներ շարունակ կառավարությունը բյուջեում գումարներ է նախատեսել՝ «արտագաղթի դեմն առնելու միջոցառումների համար»:

«Գոնե դա էլ պետք է քննարկվի: Որքան շատ գումար տրվել է, այնքան արտագաղթը շատացել է: Աբսուրդ վիճակ է»,-նշեց նա:
Հարցին, թե արդյոք քառյակը նախատեսում է հանդես գալ հարցը որպես հրատապ խորհրդարանում քննարկելու առաջարկով, Ա.Մանուկյանը հայտնեց, որ հետագա քայլերը պետք է առաջիկայում քննարկվեն քառյակի մյուս ուժերի հետ:

«Մենք կփորձենք օգտագործել այլ հնարավորություններ:Մասնավորապես, կատարված ուսումնասիրությունը պետք է տպվի, պետք է դառնա փաստաթուղթ, որն էլի իրենց կտանք: Բայց  ամոթ է, որ մեծամասնությունը չի ուզում իր երկրի թիվ մեկ մարտահրավերի հետ երես-երես նայի, ամաչում է, վախենում է»,-ընդգծեց Ա.Մանուկյանը: