Փաստ ինֆո

Ոստիկանության համակարգում ֆինանսական բուրգի գործով այսօրվա դատական նիստում հարցաքննվեց տուժող Արտակ Գալստյանը: Գործով միակ ամբաստանյալ Արթուր Անդրեասյանը տուժողի պսակադրության  քավորն է եղել, միմյանց ճանաչում են  1994-95թթ.-ից: Ի սկզբանե  տուժողն ամբաստանյալին ճանաչել է որպես «գործունյա գործարար», իսկ այսօրվա դրությամբ միանշանակ համարում է, որ «Արթուր Անդրեասյանը խարդախություն է արել»:

Ըստ տուժողի, ամբաստանյալը,  իմանալով  մանկապարտեզի վաճառքի մասին, այսինքն՝  կանխիկ գումարի առկայության մասին, առաջարկել է իրեն պարտքով 50 հազար եվրո գումար տալ՝  իր կողմից աշխատեցվող   տարադրամի փոխանակման 4 կետերում այն  «ֆռռացնելու» համար: Գումարի դիմաց ամբաստանյալն Արտակ Գալստյանին  ամսվա կտրվածքով տվել է երկու տոկոսի չափով գումար:  «Ոչ մի խնդիր չէր առաջանում, տալիս էր գումարը»,- ասաց տուժողը: Այդ գումարին հաջորդել են այլ գումարներ ևս:

Ըստ տուժողի, Արթուր Անդրեասյանի ասելով, ինքը գումարները «ֆռռացնում է» ավազահանքի ու ռեստորանի բիզնեսը  «ոտքի» կանգնեցնելու համար: Սակայն ավելի ուշ  տուժողն ամբաստանյալից տեղեկացել է, որ պարտքով գումարներ է վերցրել Երևանի և Շիրակի մարզի նախկին ոստիկանապետեր Ներսիկ Նազարյանից ու Կարեն Բաբակեխյանից (վերջիններիս ու նրանց ընտանիքի անդամների հետ ամբաստանյալն, ըստ տուժողի, մտերիմ հարաբերությունների մեջ էր) ու սնանկացել: Արդյունքում` ամբաստանյալի հորը պատկանող ավազահանքի 45 տոկոս բաժնեմասը առուվաճառքի պայմանագրով անցել է տուժողին, իսկ փաստացի տուժողին պատկանող ռեստորանի տարածքի մասին տուժողը զարմանքով իմացել է, որ այն անցել է Կարեն Բաբակեխյանին:

Ամբաստանյալը հայտարարեց, որ ինքը հարցեր ունի, սակայն  վատ ինքնազգացողության պատճառով  ի վիճակի չէ իր հարցերն ուղղել տուժողին:

Դատարանը որոշեց հետաձգել դատական նիստը,  հաջորդ դատական նիստին ամբաստանյալը հնարավորություն կունենա հարցաքննել տուժողին, այդ նիստին դատարանի որոշմամբ բերման կենթարկվեն երկու տուժողներ, ովքեր հրաժարվել են ներկայանալ դատարան: