Փաստ ինֆո

Այսօր` սեպտեմբերի 7-ին, ժամը 20:00-ին, Կոպենհագենի «Պարկեն» մարզադաշտում տեղի կունենա Հայաստան-Դանիա հանդիպումը, որի ուղիղ հեռարձակմանը  կարող եք հետեւել  «Առաջին ալիք»-ի եթերում:

Այս մրցավեճով երկու հավաքականներն էլ սկսում են իրենց ելույթները «Եվրո-2016»-ի ընտրական փուլում: Կողմերի առջեւ էլ խնդիր է դրված դուրս գալ եզրափակիչ փուլ: Armsport.am-ի փոխանցմամբ`  Հայաստանն այսպիսի կազմով կարող է հույս ունենալ, որ լինելու է Եվրոպայի լավագույն 24 հավաքականների շարքում: Իսկ Դանիայում գտնում են, որ իրենց հավաքականը պարզապես պարտավոր է դուրս գալ եզրափակիչ փուլ: Ժամանակին այս հավաքականը դարձել է Եվրոպայի չեմպիոն (1992թ.), ինչից հետո ընտրական փուլի արգելքը չհաղթահարելը մեծ անհաջողություն է դիտվում: Մորտեն Օլսենին ներեցին Մունդիալ-2014-ում չհայտնվելը, բայց «Եվրո-2016»-ի դեպքում փորձառու մասնագետից միայն դրական արդյունք են ակնկալում:

Չնայած նախորդ խաղում  0:4 հաշվով կրած պարտության` դանիացիները բարեհամբյուր են դիմավորել հայ ֆուտբոլիստներին`  նշելով, որ Հայաստանն արժանի հաղթանակ տարավ: Armsport.am-ի փոխանցմամբ` այդ պատմական խաղից անցել է 1 տարի 3 ամիս, սակայն ոչ ոք չի մոռացել գրանցված արդյունքը: Արդեն օդանավակայանում սահմանապահը, տեսնելով հայկական անձնագիրով անձանց, ժպտալով ասում էր. «Այս տարի մենք ենք հաղթելու: 4:0 հաշվով չենք կարող, բայց 2-3 գնդակ խփելու ենք»: Նման արտահայտություններ կարելի է լսել ամեն քայլափոխի: Նախորդ տարի Հայաստանի տարած տպավորիչ հաղթանակը մեծ հարված է հասցրել դանիացիների հեղինակությանը: Ֆուտբոլային երկրի համբավ ունեցող Դանիան շուրջ 50 տարի սեփական հարկի տակ նման հաշվով չէր պարտվել: