Փաստ ինֆո

Վարչապետ Հովիկ Աբրահամյանն ընդունել է Ֆրանսիայի Ազգային ժողովի սոցիալիստական խմբակցության նախագահ Բրյունո լը Ռոուի գլխավորած պատվիրակությանը: Այս մասին տեղեկացնում է Կառավարության Տեղեկատվության և հասարակայնության հետ կապերի վարչությունը:

Ողջունելով հյուրերին կառավարությունում՝ վարչապետը վստահություն է հայտնել, որ ֆրանսիացի պատգամավորների այցը կնպաստի հայ-ֆրանսիական բազմաոլորտ հարաբերությունների ամրապնդմանն ու ընդլայնմանը: «Մենք մեծապես կարեւորում ենք Ֆրանսիայի հետ քաղաքական, տնտեսական եւ այլ ոլորտներում հարաբերությունների զարգացումը: Ամեն ինչ անելու ենք, որպեսզի մեր երկկողմ կապերն էլ ավելի զարգանան, ինչի համար կա մեծ ներուժ»,- նշել է վարչապետը:

Ընդգծելով, որ ներկայում Հայաստանում հաջողությամբ գործունեություն է ծավալում ֆրանսիական 180 ընկերություն, Հովիկ Աբրահամյանը հույս է հայտնել, որ առաջիկայում դրանց թիվը կավելանա:

Վարչապետը եւ Բրյունո լը Ռոուն կարծիք են հայտնել, որ Հայաստանը կարող է հարթակ հանդիսանալ ֆրանսիական ընկերությունների համար՝ եվրասիական շուկա մուտք գործելու համար:

Ֆրանսիայի Ազգային ժողովի սոցիալիստական խմբակցության նախագահի խոսքով՝ իր երկիրը շահագրգռված է Հայաստանի զարգացմամբ ու պատրաստ է հետագայում եւս համակողմանի աջակցություն ցուցաբարել այդ գործին:

Անդրադառնալով Հայոց ցեղասպանության 100-ամյա տարելիցին՝ Բրյունո լը Ռոուն ասել է. «Ինչպես Հայաստանում նշեց Ֆրանսիայի նախագահ Ֆրանսուա Օլանդը, մենք ունենք քաղաքական կամք՝ ամբողջացնելու Հայոց ցեղասպանությունը ճանաչող օրենքը, ինչի արդյունքում կնախատեսվի քրեական հետապնդում բոլոր նրանց համար, ովքեր կժխտեն Հայոց ցեղասպանության փաստը: Վստահ ենք, որ Ցեղասպանության ճանաչումն ունի կանխարգելիչ դերակատարություն եւ խաղաղության հաստատման համար կարեւոր է դրա ժխտումը բացառելը»:

Բրյունո լը Ռոուն Հայոց ցեղասպանության 100-ամյա տարելիցի նախօրյակին կարեւորել է նաեւ հայ-ֆրանսիական միջխորհրդարանական կապերի սերտացումը՝ միջազգային հանրության շրջանում անհրաժեշտ աշխատանքներ տանելու համար:

Հովիկ Աբրահամյանը շնորհակալություն է հայտնել ֆրանսիացի պատգամավորներին իրենց դիրքորոշման համար եւ ընդգծել, որ եթե Հայոց ցեղասպանության նման ոճրագործությունները ժամանակին չեն դատապարտվում, ապա ունենում են կրկնվելու հավանականություն:

Զրուցակիցներն անդրադարձել են նաեւ Լեռնային Ղարաբաղի հակամարտությանը եւ ընդգծել դրա լուծման անհրաժեշտությունը խաղաղ բանակցությունների արդյունքում՝ ԵԱՀԿ մինսկի խմբի շրջանակում:

Կողմերը քննարկել են նաեւ հայ-ֆրանսիական հարաբերություններին առնչվող օրակարգային այլ հարցեր: