Փաստ ինֆո

«Վերջերս ես էլ նկատում եմ այդ տենդենցը, որ Ազգային ժողովի իրավաբանական վարչությունը ոչ հարիր և իր լիազորություններից դուրս ձևակերպումներ է տալիս: Ես ուղղակի զարմանում եմ հետևյալ բանի վրա, որ Ազգային ժողովի իրավաբանական վարչությունը կլինի, թե այլ վարչություն կլինի, պետք է իմանա իր միսսիան, այն է՝ սպասարկել Ազգային ժողովի պատգամավորին»,-ԱԺ պետական-իրավական հարցերի մշտական հանձնաժողովի այսօրվա նիստում՝ հանձնաժողովի անդամ Արփինե Հովհաննիսյանի հերթական օրենսդրական նախաձեռնության քննարկման ժամանակ, ասաց անկախ պատգամավոր Էդմոն Մարուքյանը:

Նախագծի հեղինակին և իր գործընկերներին, մասնավորապես, զայրացրել էր նախագծի վերաբերյալ Իրավաբանական վարչության եզրակացությունը, թե առաջարկվող փոփոխությունը նպատակահարմար չէ:

«Դա նույնն է, որ ես իմ վարորդին խնդրեմ ինձ տանի Վանաձոր, ինքն ասի՝ ես նպատակահարմար չեմ գտնում, Դուք պետք է մնաք Երևանում, կամ տանեմ Գորիս: Այսինքն՝ ես եմ որոշում՝ ուր գնամ, դու պետք է պատշաճ ձևով սպասարկես»,- ընդգծեց Է.Մարուքյանը՝ հորդորելով, որ այսուհետ նման բան այլևս չկրկնվի:

Է.Մարուքյանի այս դիտարկմանը նախորդել էր մեկ այլ հանձնաժողովականի՝ «Հայ ազգային կոնգրես» խմբակցության անդամ Գագիկ Ջհանգիրյանի կարճ ելույթը:

Պատգամավորը, մասնավորապես, այս կապակցությամբ մի դեպք հիշեց, երբ մի քանի ամիս առաջ Իրավաբանական վարչությանը խնդրել էր մի հարցի հետ կապված միջազգային փորձը ներկայացնել. «Ստացա մի գրություն, որտեղ ասվում է՝ Ղրղզստանում այսպես է, Ղազախստանում՝ այսպես»: Նա հայտնեց, թե ստիպված նոր գրություն է գրել՝ խնդրելով ներկայացնել Արևելյան Եվրոպայի երկրների փորձը, ինչին ի պատասխան ստացել է գրություն, թե «ուրիշ բան չունենք»:  

«Ես պիտի խնդրեմ, որ մեր աշխատակազմն ավելի պրոֆեսիոնալ մոտեցում ցուցաբերի: Շատ լավ է, որ տեսակետներ են հայտնում, բայց դրանք պետք է մնան կոռեկտության և օրենքի շրջանակներում: Օրենքի նախագծի նպատակահարմարության որոշումը կամ նախաձեռնումը պատգամավորի բացառիկ լիազորությունն է, և ոչ մեկն իրավունք չունի ասել՝ նպատակահարմար է, թե՝ ոչ, առավել ևս՝ ԱԺ աշխատակազմը: Դա ծիծաղելի է»,-նկատեց նա՝ հավելելով, որ կառավարությունը կարող է ասել՝ ես դեմ եմ, նպատակահարմար չի, եթե դա հատկապես կապված է ֆինանասական լրացուցիչ ծախսերի հետ, բայց «ԱԺ աշխատակազմն այդպիսի լիազորություն չունի և չի էլ կարող ունենալ»:

Լուսանկարը՝ Pan ARMENIAN Photo-ի