Փաստ ինֆո

ՆԱՏՕ-ի վերջին գագաթաժողովը նախորդ երկուսից առանձնանում է Հայաստանի՝  ՀՀ նախագահի մակարդակով մասնակցությամբ: Այս մասին լրագրողների հետ այսօրվա հանդիպմանը նշեց քաղաքագետ Կարեն Բեքարյանը:

ՆԱՏՕ-ի նախորդ գագաթաժողովների արդյունքում ընդունված փաստաթղթերում ղարաբաղյան կարգավորման հարցում  երեք սկզբունքներից կարևորվել է միայն մեկը՝ տարածքային ամբողջականության սկզբունքը: Ուստի՝ Հայաստանի բարձր ղեկավարությունը  որոշել էր, որ  ավելի արդյունավետ կարող է լինել ՀՀ նախագահի մակարդակով գտնվել տեղում և հստակ արտահայտել սեփական դիրքորոշումը, մասնավորապես՝ ղարաբաղյան հակամարտության կարգավորման  համատեքստում:
 
ՀՀ նախագահ Սերժ Սարգսյանը, մասնավորապես, հստակ արձանագրեց, որ հարևան երկրում կա բռնակալ նախագահ:  

Քաղաքագետը նշեց, որ ինքն անձամբ եղել ու մնում է այն կարծիքին, որ Ադրբեջանի լկտի ու ցինիկ պահվածքի մեջ պատասխանատվության իրենց բաժինն ունեն ԼՂ կարգավորմամբ զբաղվող ԵԱՀԿ Մինսկի խմբի համանախագահ երկրները: ԱՄՆ-ն ու Ֆրանսիան, ելնելով աշխարհաքաղաքական պահից և, մասնավորապես, Ուկրաինայի խնդրից, աչք են փակում Ադրբեջանի հետ կապված բավականին խնդրահարույց իրավիճակի վրա:

Արդյունքում՝ դրանով թույլ են տալիս Ադրբեջանին մտածել, որ իրեն ամեն ինչ կարելի է: Դրանով է պայմանավորված Ադրբեջանի կողմից տարաբնույթ շանտաժների ու պրովոկացիաների դիմելը, ինչը սահմաններում լարվածության և «մեր երիտասարդների մահվան» հանգեցրեց: 

Կարեն Բեքարյանը կարծում է, որ այս պարագայում Ադրբեջանի նախագահը չպետք է հրավիրվեր գագաթաժողովին:  

Ռուսաստանը ևս՝ որպես համանախագահ երկիր, իր պատասխանատվության բաժինն ունի. Ադրբեջանին սպառազինելը ինչպես էլ մեկնաբանվի՝ «բիզնես շահ», թե՝ այլ կերպ, Ադրբեջանը դա այլ կերպ է գնահատում:

Կարեն Բեքարյանը դժգոհություն հայտնեց նաև, որ ՆԱՏՕ-ի անդամ երկիր հանդիսացող և Հայաստան-Թուրքիա սահմանը փակած  Թուրքիան փորձում է իր լոբբինգն իրականացնել հօգուտ Ադրբեջանի:

Կարեն Բեքարյանը նշեց, որ եթե ՆԱՏՕ-ի վերջին գագաթաժողովը նախորդ երկու գագաթաժողովների նման ևս ընդունի դոգմատիկ բնույթի փաստաթուղթ, ապա Ադրբեջանի պահվածքը կդառնա ավելի կոշտ, ցինիկ ու պրովոկացիոն, այդ դեպքում կարժեզրկվեն ԱՄՆ պետքարտուղար Ջոն Քերրիի հայտարարությունն ու նրա, Ադրբեջանի ու Հայաստանի նախագահների եռակողմ հանդիպումն ինքնին:

Կարեն Բեքարյանը գտնում է, որ միջազգային հանրությունը հակամարտության կողմերի միջև վստահության միջոցները ամրապնդելու համար խոստումները պետք է դարձնի առարկայական: Դրանց թվում են՝ դիպուկահարներին հետ քաշելը, սահմանային միջադեպերի հետաքննության մեխանիզմների ստեղծումը, սեփական ժողովուրդներին խաղաղության պատրաստելը:

«Կարծում եմ, որ հստակեցումենրը պիտի շարունակվեն և արդյոք նույն վստահության միջոցների մեջ չէ՞ առանց որևէ խոչընդոտի Ստեփանակերտ-Երևան ավիաչվերթի ապահովումը»,- հավելեց Կարեն Բեքարյանը: