Փաստ ինֆո

Այսօր հանրությանը ներկայացվեց Բաքվից փախստական, ներկայումս ԱՄՆ-ում բնակվող Աննա Տերկոտ-Աստվածատուրյանի «Այլուրեք. Վտարում» գիրքը 1988-92 թթ. Բաքվի ջարդերի մասին: 

Գրքի հեղինակը 11 տարեկան հասակում ծնողների ու եղբոր հետ միասին Բաքվից փախել են, սկզբում բնակություն հաստատել երկրաշարժի հետևանքները, անցումային շրջանի դժվարությունները հաղթահարող Հայաստանում, ապա, որպես փախստականներ, տեղափոխվել ԱՄՆ:

Բաքվում կրած դժվարությունների ու հալածանքների մասին իր օրագիրն աղջիկն սկսել է գրել 14 տարեկանում ու ավարտել 16 տարեկանում, սակայն հրատարակել է արդեն հասուն տարիքում՝ 20 տարի անց:

Աննա Տերկոտ-Աստվածատուրյանը լրագրողների հետ այսօրվա հանդիպմանը նշեց, որ Բաքվի հայությունը նոր համայնք է ԱՄՆ-ում, որն ամբողջ հայ համայնքի հետ համատեղ իրականացնում է ի նպաստ Հայաստանի ու Լեռնային Ղարաբաղի գործունեություն՝ ուղղված Ադրբեջանի հակահայ բանաձևերի ձախողմանն ու ԼՂՀ ճաանաչման գործընթացին, հայերի կրած տառապանքները ներկայացնելուն: Աննայի ու նրա ամուսնու ջանքերով է Մեն նահանգը ճանաչել Արցախի անկախությունը:

ՀՀ նախագահի աշխատակազմի Հանրային կապերի և տեղեկատվության կենտրոնի «Սովորական ցեղասպանություն» նախագծի ղեկավար Մարինա Գրիգորյանը նշեց, որ գիրքը բացառիկ է իր տեսակի մեջ. ըստ էության՝ առաջին անգամ է, որ անգլերեն լեզվով միջազգային հանրությանը ներկայացվում է իրականությունը՝ Բաքվի ջարդերի մասին: Միջոցներ են փնտրվում՝ նաև գիրքը ռուսերեն ու հայերեն լեզուներով թարգմանելու համար: Գիրքը, ի դեպ, տպաքանակի սահմանափակումներ չունի, տպագրվում է՝ ըստ պահանջարկի, հասու է նաև գրքի էլեկտրոնային տարբերակը:

Մ.Գրիգորյանը անդրադարձավ նաև «Սովորական ցեղասպանություն» նախագծին, որի շրջանակներում 5 ֆիլմ է նկարահանվել, մի քանի գիրք է լույս ընծայվել, ստեղծվել կայք, պատրաստվել բազմաթիվ քարոզչական նյութեր:

Նախագծի շրջանակում ԱՄՆ-ում ձայնագրվել են Բաքվի 45-50 փախստականների պատմություններ, դրանց հիման վրա ֆիլմ կնկարահանվի, որը հայերեն, անգլերեն ու ռուսերեն լեզուներով նախատեսում են ավարտել մինչև հաջորդ տարվա հունվար ամիսը: