Փաստ ինֆո

«Վանաձոր» բժշկական կենտրոնի վիրաբուժական բաժանմունքի վարիչ Վլադիմիր Ղուկասյանի փաստաբան Վահան Ավագյանը, պատասխանելով քրեական գործի նախաքննության ավարտի և գործը դատարան ուղարկելու մասին «Փաստինֆո»-ի հարցին, համոզմունք հայտնեց, որ գործը դատաքննության փուլ չի հասնի:

«Չեմ կարծում, որ նշված քրեական գործը, որում իսպառ բացակայում են ապացույցներ, որոնցով հիմնավորված լինի իմ պաշտպանյալին մեղսագրվող հանցագործությունը, ունի դատարան մտնելու հեռանկար: Այս պարագայում միանշանակ է, որ դատական քննության փուլ տեղի չի ունենալու, հետևապես էլ սպասելիքներ չեն կարող լինել»,- հայտնեց փաստաբանը:

Հիշեցնենք՝ «Վանաձոր» բժշկական կենտրոնի վիրաբուժական բաժանմունքի վարիչ Վլադիմիր Ղուկասյանը մեղադրվում է մասնագիտական պարտականությունների նկատմամբ անբարեխիղճ վերաբերմունք դրսևորելու և դրանք ոչ պատշաճ կատարելու հետևանքով անզգուշությամբ հիվանդի մահն առաջացնելու մեջ:

Նրան մեղադրանք է առաջադրվել 2013թ. հոկտեմբերին Վանաձորում տեղի ունեցած դանակահաության գործի նախաքննության շրջանակներում կատարված 2 դատաբժշկական հանձնաժողովային փորձքննությունների հիման վրա:

«Նախաքննության մարմնի կողմից իմ պաշտպանյալ Վլադիմիր Ղուկասյանին առաջադրված մեղադրանքը «կառուցվել է»` հիմք ընդունելով նշված եզրակացություններում առկա ենթադրությունները, այն որ եթե բժիշկը ավելի վաղ կատարեր վիրահատությունը, ապա հնարավորինս կմեծանար տուժողի կյանքը փրկելու հավանականությունը: Ընդհանրապես որևէ ենթադրությունների վրա հիմնված մեղադրանքը չի կարող արդարացված լինել որևէ անձի համար, քանի որ ինչպես ներպետական, այնպես էլ միջազգային իրավական նորմերով ամրագրված է մեկ սկզբունք, առ այն, որ եթե քրեական գործում առկա են չփարատված կասկածներ, ապա դրանք պետք է մեկնաբանվեն հօգուտ կասկածվողի»,- նշեց փաստաբանը:

Օգոստոսի 29-ին Լոռու մարզի ընդհանուր իրավասության առաջին ատյանի դատարանը, բավարարելով նախաքննական մարմնի միջնորդությունը, բժիշկ Վլադիմիր Ղուկասյանի նկատմամբ որպես խափանման միջոց՝ երկամսյա կալանքի որոշում էր կայացրել:

Բժշկի փաստաբան Վահան Ավագյանը մեզ հետ զրույցում նշեց, որ այդ որոշումն արդեն իսկ բողոքարկել է վերաքննիչ քրեական դատարան:

Հիշեցնենք՝ հոկտեմբերի 12-ին՝ երեկոյան 19:30-ի սահմաններում, կրծքավանդակի ձախ հատվածում՝ սրտի մոտ, սուր ծակող-կտրող գործիքից ստացած վնասվածքով Վանաձորի բժշկական կենտրոն տեղափոխված 15-ամյա Դավիթ Հովակիմյանը մահացել էր։ Տղան Երևանի բնակիչ էր և Վանաձոր էր ժամանել՝ ձեռքի գնդակի մրցումներին մասնակցելու համար, իսկ այդ օրը ընկերների հետ նշելիս են եղել իրենց թիմի հաղթանակը:

Դեպքից անմիջապես հետո լուրեր տարածվեցին, թե տղաները վիճել են իրենց ինչ-որ հասակակցի հետ, որն էլ դանակահարել է Դավիթին: Ու թեև Վանաձորում լուրեր էին պտտվում, որ սպանությունը կատարողը Վանաձորի ԱԱԾ աշխատակից Արտակ Բաբայանի անչափահաս որդին է, ով նույնպես զբաղվում է սպորտով:

Բայց դեպքից 3 օր անց Վանաձորի ոստիկանությունը սպանությունը կատարելու կասկածանքով ձերբակալեց «Քուրդ» մականունով, նախկինում 2 անգամ դատված վանաձորցի, 22-ամյա Կարեն Կունգորցևին, ով արդեն տևական ժամանակ կալանավորված է, բայց իրեն մեղավոր չի ճանաչում: