Փաստ ինֆո

Արարատյան դաշտում շահագործվող ապօրինի և նույնիսկ օրինական խորքային հորերը բնական աղետի են հասցրել Արարտյան դաշտը, կամ, ինչպես կառավարությունում են ասում, «սպառման եզրին են ստորերկրյա ջրային ռեսուրսների պաշարները»:

Իհարկե, աղետը կանխելու համար կառավարությունն ապօրինի հորերը փակելու գործընթաց է սկսել, բայց այս միջոցառումները, պարզվում է, բավական չեն, լիարժեք գործի համար նաև գումար է պետք:

Բնապահպանության նախարաությունում հաշվել են, որ 40 165 000 դրամը բավական կլինի և դիմել են կառավարությանը` 2014թ. բյուջեից այդ գումարն իրենց հատկացնելու պահանջով: Թե ինչ կորոշեն գործադիրում, պարզ կլինի առաջիկա հինգշաբթի օրը, երբ հարցը ներկայացվի կառավարության անդամների քննարկմանը, իսկ մինչ այդ ներկայացված նախագծից պարզ է դառնում, որ պահանջվող 40 մլն-ը ծախսվելու է ոչ թե բնության, այլ՝ թղթաբանության, այն է` Արարատյան դաշտի ջրավազանային կառավարման պլանի մշակման համար:

Ըստ նախագծի հեղինակների՝ այս պլանը կօգնի «հավասարակշռելու, ջրային ռեսուրսների առաջարկը և պահանջարկը, բացահայտելու ջրավազանում արտակարգ իրավիճակների հնարավոր ռիսկերը, դրանց կանխարգելման և նվազեցման միջոցառումները»:

Փաստորեն, ստացվում է, որ նախկինում հորեր բացելու և ստորերկրյա ջրերն անխնա վատնելու իրավունք է տրվել առանց որևէ հաշվարկի: Իսկ արդեն հասցրած աղետի չափը հաշվելու համար 40 մլն դրամ է պահանջվում:

Ի դեպ, կառավարության՝ դեռևս անցյալ տարի ընդունած որոշման համաձայն՝  «վտանգավոր» հորատանցքերի փակման, դրանց տերերի հետ պայմանագրերի լուծարման համար վերջնաժամկետ է սահմանվել է 2015թ. սեպտեմբերի 1-ը: Այս գործընթացը վաղուց արդեն սկսվել է: Ու թեև իրենց բիզնեսից զրկվածները պնդում են, որ կառավարությունն այսպիսով «յուրայիններին» ազատում է անցանկալի մրցակիցներից, բայց բնապահպանության նախարարը վստահեցնում է, որ այս խոսակցություններն ուղղակի «հերյուրանքներ» են: