Փաստ ինֆո

«Մավա Իմպուլս»  ՍՊԸ տնօրեն Բենյամին Շանոյանը դատավճռով ճանաչվել է անպարտ և արդարացվել՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ առանձնապես խոշոր չափերով յուրացնելը կամ վատնելը, 214-րդ հոդվածի 2-րդ մասով՝ առևտրային կազմակերպության ծառայողի կողմից լիազորությունները չարաշահելը, որն առաջացրել է ծանր հետևանքներ, և 325-րդ հոդվածի 1-ին մասով՝ փաստաթղթեր կեղծելը, իրացնելը կամ օգտագործելը, առաջադրված մեղադրանքներում:

«Շանթ Պլյուս» ՍՊԸ  գլխավոր հաշվապահ Լիանա Մարտիրոսյանն անպարտ է ճանաչվել ու արդարացվել՝ ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով՝ մի խումբ անձանց կողմից նախնական համաձայնությամբ, խոշոր չափերով խարդախություն,  178-րդ հոդվածի 2-րդ մասի 2-րդ կետով՝ խոշոր չափերով խարդախություն  և 178-րդ հոդվածի 3-րդ մասի 1-ին կետով՝ առանձնապես խոշոր չափերով խարդախություն,  առաջադրված մեղադրանքներում:

«Արմեն ՕՍՍ» ՍՊ ընկերության տնօրեն Կարեն Պողոսյանը ճանաչվել է անպարտ և արդարացվել՝ ՀՀ քրեական օրենսգրքի 38-179-րդ հոդվածի 3-րդ մասի 1-ին կետով՝ առանձնապես խոշոր չափերի յուրացմանը կամ վատնմանը օժանդակելը, առաջադրված մեղադրանքում:

Դատաքննության ընթացքում մահացած, «ԵՐԵՎԱՆ ՊԼՅՈՒՍ» ՍՊ ընկերության տնօրեն Վարուժան Մանուկյանը ճանաչվել է անպարտ և արդարացվել՝   ՀՀ քրեական օրենսգրքի 214-րդ հոդվածի 2-րդ մասով առաջադրված մեղադրանքում:

Իսկ  Վարուժան Մանուկյանին ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով առաջադրված մեղադրանքի առնչությամբ դատարանն առանձին դատական ակտով որոշում է կայացրել՝ նրա մահվան հիմքով քրեական գործի վարույթը կարճելու մասին:

Ըստ մեղադրանքի, Բենյամին Շանոյանը, հանդիսանալով «Մավա Իմպուլս» ՍՊԸ-ի տնօրեն, «Արմեն ՕՍՍ» ՍՊԸ-ի տնօրեն Կարեն Պողոսյանի օժանդակությամբ կեղծ հաշիվ-ապրանքագրերի պատրաստմամբ և օգտագործմամբ վատնել են «Մավա Իմպուլս» ՍՊԸ-ին պատկանող խոշոր չափերի գումար:

Լիանա Մարտիրոսյանին առաջադրված մեղադրանքի համաձայն՝ նա, աշխատելով «Շանթ Պլյուս» ՍՊԸ-ում՝ որպես գլխավոր հաշվապահ, չարաշահելով բաժնետերերի վստահությունը, վաճառել է «Շանթ Պլյուս» ՍՊԸ-ին և «Մավա Իմպուլս» ՍՊԸ-ին պատկանող ավտոմեքենաներ, խաբեությամբ ներկայացրել և դրամարկղ է մուտքագրել վաճառքից ստացված գումարի մի մասը, իսկ մնացած խոշոր չափի գումարը խաբեությամբ հափշտակել է:

Վարուժան Մանուկյանը, մեղադրանքի համաձայն, աշխատելով «Երևան Պլյուս» ՍՊԸ-ում՝ որպես տնօրեն, իր կարգադրիչ լիազորություններն օգտագործել է կազմակերպության շահերին հակառակ, ակնհայտ կատարել է անշահավետ գործարքներ` ընկերության բաժնետերերին պատճառելով խոշոր չափերի նյութական վնաս:

Գործի դատաքննության ավարտից հետո՝ դատական վիճաբանությունների փուլում, մեղադրողը հայտարարել էր, որ հրաժարվում է ամբաստանյալ Կարեն Պողոսյանի նկատմամբ ՀՀ քրեական օրենսգրքի 38-179-րդ հոդվածի 3-րդ մասի 1-ին կետով, ամբաստանյալ Բենիամին Շանոյանի նկատմամբ ՀՀ քրեական օրենսգրքի 179-րդ հոդվածի 3-րդ մասի 1-ին կետով և 214-րդ հոդվածի 2-րդ մասով, ամբաստանյալ Լիանա Մարտիրոսյանի նկատմամբ ՀՀ քրեական օրենսգրքի 178-րդ հոդվածի 2-րդ մասի 2-րդ կետով և 178-րդ հոդվածի 3-րդ մասի 1-ին կետով, Վարուժան Մանուկյանի նկատմամբ ՀՀ քրեական օրենսգրքի 214-րդ հոդվածի 2-րդ մասով քրեական հետապնդում իրականացնելուց և միջնորդում է մեղադրանքի՝ այդ մասերով նրանց նկատմամբ քրեական հետապնդումը դադարեցնել՝ հանցակազմի բացակայության հիմքով:

Դատարանը գտել է, որ անհրաժեշտ է կայացնել արդարացման դատավճիռ:

Ստուգելով ամբաստանյալներ Բենյամին Շանոյանին ՀՀ քրեական օրենսգրքի 325-րդ հոդվածի 1-րդ մասով և Լիանա Մարտիրոսյանին ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով առաջադրված մեղադրանքները կատարելու վերաբերյալ գործով ձեռք բերված ապացույցները,  ամբաստանյալների մեղավորության վերաբերյալ չփարատվող բոլոր կասկածները նրանց օգտին մեկնաբանելով` դատարանը գտել  է, որ քրեական գործով ոչ միայն ապացույցներ ձեռք չեն բերվել, որոնք կհաստատեն Բենյամին Շանոյանի և Լիանա Մարտիրոսյանի կողմից նրանց մեղսագրվող հանցանքները կատարելու հանգամանքը, այլև ձեռք բերված ապացույցները հերքում են նրանց առաջադրված մեղադրանքները: