Փաստ ինֆո

Չինաստանի Նանջինգ քաղաքում տեղի ունեցած պատանեկան օլիմպիական խաղերը բացահայտեցին հայրենի սպորտի ներուժը՝ ապացուցելով, որ հուսալի հերթափոխ ունենք: Այդ մասին այսօրվա ասուլիսում հայտարարեց ՀԱՕԿ-ի գլխավոր քարտուղար Հրաչյա Ռոստոմյանը:

Նրա խոսքերով, այս ստուգատեսի մեր մասնակիցներից 2016 թվականին Ռիո դե Ժանեյրոյում անցկացվելիք ամառային օլիմպիական խաղերում հանդես գալու առավել իրական հնարավորություն ունեն ծանրորդ Սիմոն Մարտիրոսյանը եւ հրաձիգ Հրաչյա Բաբայանը: «Խաղերից առաջ եւ դրանց ընթացքում կատարվել է մեծ ծավալի աշխատանք, որի արդյունքում ունեցանք 7 մեդալակիր:

Դա վերաբերում է թե՛ ուսումնամարզական աշխատանքների կազմակերպմանը, թե՛ նյութատեխնիկական բազայի խնդիրների լուծմանը: Այս արդյունքը հույս է ներշնչում, որ ունենք լավ հերթափոխ: Վստահ եմ՝ 2018 թվականին Բունեոս Այրեսում կայանալիք պատանեկան օլիմպիադայում ավելի լավ ցուցանիշներ ենք ունենալու»,- հայտարարեց բանախոսը:

Անդրադառնալով նախնական ակնկալիքներին, Հ. Ռոստոմյանը խոստովանեց, որ Չինաստան մեկնած 14 մարզիկներից մեդալի ակնկալիք չուներ միայն լողորդ Վահան Մխիթարյանից, որը Հայաստանում դեռեւս զրկված է մարզումային նորմալ պայմաններից:

Մարմնամարզիկ Վիգեն Խաչատրյանի պարագայում պատանու առողջությունը գերադասվել է մեդալից:

Հիշեցնենք, որ երեւանցին անցնելով խաղերի առանձին վարժությունների եզրափակիչ՝ վնասվածքի պատճառով չմասնակցեց դրանց: «Կարող էինք խիզախել եւ նրան ներկայացնել եզրափակիչ մրցումներին: Երկու մրցաձեւում նա միանշանակ մեդալ էր նվաճելու, սակայն խորհրդակցելով ՀԱՕԿ-ի նախագահ Գագիկ Ծառուկյանի հետ, որոշեցինք ռիսկի չդիմել»,- մանրամասնեց գլխավոր քարտուղարը:

Պաշտոնյայի կարծիքով, մարզումային անբավարար պայմանների արգասիք է նաեւ ջրացատկորդ Լեւ Սարգսյանի արդյունքը: Սակայն, նրանից ապագայի լուրջ ակնկալիքները մնում են օրակարգում:

Բնականաբար, առանձնակի հույզեր է առաջացրել խաղերում մեր երկրի հաշվին գրանցված առաջին ոսկե մեդալը, որը նվաճել է ծանրորդ Հակոբ Մկրտչյանը: Իսկ նույն մարզաձեւում մեր մյուս ներկայացուցիչ Սիմոն Մարտիրոսյանի հաղթանակը կրկնապատկել է հայկական պատվիրակության ցնծությունը: «Սա իսկապես օլիմպիական թիմ էր, որում իշխում էր մեկը բոլորի, բոլորը՝ մեկի համար սկզբունքը»,- փաստեց Հ.Ռոստոնյանը:

Նա կարծում է, որ այս հաջողությունը կարող է խթանել նաեւ դպրոցական սպորտի զարգացումը. «Դիմելու ենք կրթության եւ գիտության նախարարություն, որպեսզի կազմակերպենք պատանեկան օլիմպիադայի մեր մրցանակակիրների քարոզչական այցերը հանրակրթական դպրոցներ: Այս արդյունքը մեր մարզիկների մեջ սերմանեց այն համոզմունքը, որ հաջողության կարելի է հասնել երկարատեւ ու քրտնաջան աշխատանքի

շնորհիվ: Լինելով փոքր պետություն՝ արդյունավետ չենք օգտագործում մեր ներուժը: Անհրաժեշտ է ավելի մասսայական ու մատչելի դարձնել սպորտը երեխաների եւ պատանիների շրջանում»,- ասաց Հրաչյա Ռոստոմյանը:

Հայտարարվեց նաեւ, որ տակավին որոշված չէ հաջորդ տարի Բաքվում անցկացվելիք Եվրոպական առաջին օլիմպիադային մեր մարզիկների մասնակցության հարցը: Ամեն ինչ կախված է նրանից, թե ինչ կտա մասնակցությունը. «Եթե այդ խաղերի ընթացքում օլիմպիական ուղեգրեր չեն խաղարկվելու, ապա մասնակցելն անիմաստ է: Ամեն դեպքում, հարցը քննարկվելու է հոկտեմբերին Եվրոպայի օլիմպիական կոմիտեի նախագահի Հայաստան կատարելիք այցի ժամանակ, որի ընթացքում նա հանդիպելու է ՀԱՕԿ-ի ղեկավարին»,- եզրափակեց մարզական պաշտոնյան: