Փաստ ինֆո

Դերասան Վարդան Պետրոսյանի գործով անկախ փորձաքննություն անցկացնելու պահանջով ստորագրահավաքի նախաձեռնող խումբը որոշել է շարունակել այն նաև սեպտեմբեր ամսին:

Այս մասին «Փաստինֆո»-ին հայտնեց ստորագրահավաքի կազմակերպիչներից Գայանե Հովհաննիսյանը` նշելով, որ քանի որ ստորագրահավաքը կազմակերպվել էր ամռանը` արձակուրդային պասիվ սեզոնին, և դրա ակտիվությունը իրենց չի բավարարել, իրենք որոշում են կայացրել շարունակել այն նաև սեպտեմբերին:

Նշենք, որ նախապես որոշվել էր ստորագրահավաքն անցկացնել դատավարության 1-ամսյա ընդմիջման ընթացքում` օգոստոսի 7-ից մինչև օգոստոսի 29-ին կայանալիք նիստը:

Ինչ վերաբերում է հավաքված ստորագրությունների թվին, Գայանե Հովհաննիսյանը նշեց, որ արդյունքներն առայժմ չեն ամփոփվել, ստորագրահավաքն ընթանում է մայրաքաղաքի տարբեր հատվածներում և հանրապետության տարբեր մարզերում, և դրանց արդյունքները կմեկտեղվեն միայն ստորագրահավաքն ավարտելու որոշում կայացնելուց հետո:

Ի դեպ, ստորագրահավաքն ընթանում է նաև էլեկտրոնային տարբերակով: Այս դեպքում արդյունքների լրացուցիչ հաշվարկի կարիք չկա: Ներկա պահին էլեկտրոնային կայքում քվեարկածների թիվը 1050 է:

«Հաշվի առնելով, որ Վ. Պետրոսյանի գործով կատարված առաջին դատաավտոտեխնիկական փորձաքննությունից հետո ի հայտ են եկել բազմաթիվ նոր փաստեր և ապացույցներ, ինչպես նաև այն հանգամանքը, որ նախաքննությունն ընթացել է բազմաթիվ խախտումներով ու կեղծիքներով` մենք՝ ներքոստորագրյալներս, պահանջում ենք, որ Վ. Պետրոսյանի գործով տեղի ունենա նոր և անկախ փորձաքննություն»,- ասված է ստորագրահավաքի հայտարարության մեջ:

Հիշեցնենք, Վարդան Պետրոսյանին մեղադրանք է առաջադրվել 2013թ. հոկտեմբերի 20-ին` Եղվարդ- Երեւան ավտոճանապարհին տեղի ունեցած վթարի գործով, որի արդյունքում երկու անչափահաս մահացել էին, մեկը` ստացել ծանր մարմնական վնասվածք:

Ստորագրահավաքի կազմակերպիչները հիշեցնում են, որ «ՀՀ քրեական օրենսգրքի 242-րդ հոդվածի 3-րդ մասով դատարանը մարդուն կարող է դատապարտել միայն այն դեպքում, եթե նա թույլ է տվել ճանապարհային երթևեկության կանոնների խախտում»: «Իսկ այդ փաստը կարող է հաստատվել միայն դատաավոտեխնիկական փորձաքննության եզրակացությամբ»,- ասված է հայտարարության մեջ: