Փաստ ինֆո

Դատարանը «Նարե» հյուրանոցի մատուցողուհի Հասմիկ Թադևոսյանին մեղավոր է ճանաչել իր հետ նույն տանը բնակվող Սիրանուշ Թադևոսյանին ծեծելու համար և նրա նկատմամբ պատիժ նշանակել տուգանք` ՀՀ-ում սահմանված նվազագույն աշխատավարձի ութսունապատիկի` 80.000 ՀՀ դրամի չափով։

Ամբաստանյալի վկայությամբ՝ ինքը տուժողի հետ միշտ ունեցել է լարված հարաբերություններ։ Ամբաստանյալը, չընդունելով մեղադրանքը, հայտնել է, որ 2014թ. մայիսի 07-ին իրենց տան բակում կենցաղային հարցերի շուրջ վիճաբանության մեջ է մտել Ս.Թադևոսյանի հետ և քարը ձեռքում պահած ասել է, որ կհարվածի, եթե չդադարի իր նկատմամբ անբարո խոսքեր ասելը:

Այդ  ընթացքում միջամտել է Ս.Թադևոսյանի որդին՝ Արշավիր Թադևոսյանը, ով փորձելով հանդարտեցնել վիճաբանությունը՝ գրկել է իրեն, տարել տուն:

Դրանից հետո ինքը տանից վերցրել է խոհանոցային դանակը, հետ վազել, իսկ Ս.Թադևոսյանը հատակ մաքրելու փայտով, հարվածել է իր ձեռքին, որի հետևանքով դանակը ընկել է գետնին։

Ամբաստանյալը նշել է, որ Արշավիրի կողմից իրեն գրկելու ընթացքում ձեռքի անկանոն շարժումներով հարվածներ է ուղղել Ս.Թադևոսյանին, որոնցից մեկ-երկուսը հնարավոր է, որ դիպել է նրան։

Ամբաստանյալը հայտնել է, որ վկա Արշավիր Թադևոսյանը ստում է, ինքը Ս.Թադևոսյանին 6 անգամ չի հարվածել և տեղյակ չէ, թե տուժողն այդ վնասվածքները որտեղից կարող էր ստանալ։ Չի բացառում, որ տուժողն իր մարմնական վնասվածքները ստանար ինքն իրեն խեղելու և հարվածներ հասցնելու հետևանքով։

Դատարանն արձանագրել է, որ ամբաստանյալ Հասմիկ Թադևոսյանի կողմից տրված ցուցմունքները չեն համապատասխանում իրականությանը, դրանք մտացածին են, քանի որ նրան առաջադրված մեղադրանքը հիմնավորվել է դատարանում հետազոտված  ապացույցներով: