Փաստ ինֆո

«Հին Էրիվան Հոլդինգ» ՍՊԸ-ի սնանկության գործով  այսօրվա դատական նիստում  «Հին Էրիվանի» սեփականատեր Մանվել Տեր-Առաքելյանի ներկայացուցիչ Դավիթ Դանիելյանը սկսեց ներկայացնել իրենց  առարկությունները: Ներկայացուցիչը առարկությունները կշարունակի ներկայացնել հաջորդ  դատական նիստում: Մինչև հաջորդ դատական նիստը՝  սեպտեմբերի 5-ը,  հակառակ կողմը հնարավորություն կունենա ծանոթանալ «Հին Էրիվանի»  ներկայացրած մի շարք փաստաթղթերին, որտեղ տեղ են գտել կողմի փաստարկները:  

Շուրջ երկու ժամ տևած դատական  նիստի ընթացքում «Հին Էրիվանի» ներկայացուցիչը հերթական անգամ փորձեց պարզել, թե ինչ հաշվարկների հիման վրա  է գոյացել «Յունիբանկին» «Հին Էրիվանի» պարտքի գումարը՝  մոտ 8 մլն դոլարը՝ որքան է կազմում, ըստ «Յունիբանկի», մայր գումարը և որքան՝ տոկոսները,  սակայն Դավիթ Դանիելյանը հերթական անգամ դատարանի ուշադրությունը հրավիրեց այն իրողության վրա, որ ըստ էության պատասխաններ չհնչեցին:

«Յունիբանկի»  ներկայացուցչի վարձատրության վերաբերյալ հարցին ի պատասխան բանկի ներկայացուցիչ Հայկ Հարությունյանը նշեց, որ համեմատած տարիների ընթացքում կատարած մեծ ու դժվարին աշխատանքի հետ, ինքն այնքան էլ շատ չի ստանում, հատկապես հաշվի առնելով այն, որ ինքը «սև փիառի» թիրախ է դարձել, իր նկարը հայտնվել է «Հին Էրիվանի» շենքին՝  Բեն Լադենի լուսանկարի հարևանությամբ:  Դավիթ Դանիելյանը չհապաղեց  արձագանքել այս դատողություններին՝ «այնպիսի տպավորություն է ստեղծվում, որ Դուք ոչ թե բանկի, այլ բարեգործական կազմակերպության ներկայացուցիչ եք»,- ասաց նա:

Ի դեպ, այսօրվա դատական նիստին չէր ներկայացել սնանկության գործով նոր կառավարիչը՝  Հրանտ Համբարյանը, սակայն ներկայացել էր ևս մեկ պարտատեր՝  Հայկ Հարությունյանը, ում անձնագրային տվյալները բանկի ներկայացուցչի պահանջով մանրակրկիտ կերպով ստուգվեցին:  

Հիշեցնենք, որ դատարանը «Հին Էրիվան Հոլդինգ» ՍՊԸ-ի կողմից դատարան ներկայացված գրավոր առարկությունների հիման վրա պետք է քննի ընկերության դեմ պահանջ ներկայացրած 15 պարտատերերի, այդ թվում՝ «Յունիբանկ» ՓԲԸ-ի կողմից ներկայացված 3,103,867,029.42 ՀՀ դրամ պահանջի օրինականության, հիմնավորվածության, չափի և ապահովվածության հարցերը: