Փաստ ինֆո

«Մենք ստուգել ենք ալկոմետրով, մեզ մոտ արձանագրվել է սթափության աստիճանը՝ 0, չկա խմածություն»,- դատարանում հայտարարեց Վարդան Պետրոսյանի վթարի գործով դատակոչված Եղվարդի հիվանդանոցի հերթապահ բժիշկ Համազասպ Գևորգյանը, ով դեպքից հետո առաջինն է ստուգել Վ.Պետրոսյանի խմածության աստիճանը:

Պատասխանելով տուժողի շահերի ներկայացուցիչ Ռուբեն Բալոյանի հարցին, թե արդյոք Վարդան Պետրոսյանն ի վիճակի է եղել ստուգվելու` վկան չհերքեց, որ հնարավոր է  այդ պահին վատ վիճակում գտնվող Վարդան Պետրոսյանը չկարողանար բավարար ուժով փչել ալկոմետրի մեջ, քանի որ «շնչառական անբավարարություն է ունեցել», բայց և նշեց, որ արտաշնչած օդի քանակը բավարար է եղել, որպեսզի սարքը արձանագրի արտաշնչած օդի մեջ ալկոհոլի բացակայությունը:

Հարցին, թե ինչու է արձանագրության վրա ձեռագրով լրացված, որ արտաշնչած օդի մեջ ալկոհոլի հոտ չկա, բժիշկը հայտնեց, որ դա արվել է ավելի ուշ՝ գլխավոր բժշկի հրահանգով և բուժքրոջ ձեռքով:

Այսպիսով գործի նյութերում հայտնվել են նույն արձանագրության 2 օրինակներ, որոնցից մեկի վրա ձեռագրով ավելացված է ՝«արտաշնչած օդի մեջ ալկոհոլի հոտ»: Բժիշկը պարզաբանեց, որ դա արվել է ավելի ուշ, երբ Վարդան Պետրոսյանի պաշտպանը դիմել է հիվանդանոցին՝ խնդրելով պարզաբանել սթափության որոշման մեթոդը, որի համար էլ արվել է հիշյալ գրառումը: Վկայի այս պարզաբանումը, սակայն չբավարարեց տուժողի ներկայացուցչին, ով փորձեց վկային նույն հարցը տալ տարբեր ձևակերպումներով՝ հարուցելով ոչ միայն պաշտպանական կողմի, այլև դատավորի զայրույթը:

«Պատասխանել է, պարոն Բալոյան, վերցրեք լազերային սկավառակը, լսեք, պատասխանել է»,- դիմելով տուժող կողմի ներկայացուցիչ Ռուբեն Բալոյանին՝ ասաց դատավոր Վաղինակ Մկրտչյանը:

Այսօր  դատարան հրավիրված երրորդ վկան Եղվարդի բնակիչ, Հրշեջ-փրկարարական ջոկատի ավագ վարորդ Տիգրան Պետրոսյանն էր, ով հերթապահել է վթարի օրը և ահազանգով մեկնել վթարի վայր:

Վկան դատարանին պատմեց, որ վթարի վայր հասնելով, տեսել է, որ ինչ-որ 2 հոգի փորձում են BMW-ի միջից դուրս բերել Վարդան Պետրոսյանին, սակայն չեն կարողանում: Ինքը լինգով բարձրացրել է վարորդի նստարանն ու օգնել Վարդան Պետրոսյանին դուրս բերել այնտեղից:

Հարցին, թե այդ պահին ալկոհոլի հոտ զգացել է, վկան պատասխանեց, որ հոտ չի զգացել:

Վկան նաև հայտնեց, որ իր վերադասի հրամանով միացրել է իր վարած հրշեջ ավտոմեքենայի ջուրը, որով ռետինե խողովակով լվացվել է ավտոճանապարհը: Նիկոլայ Բաղդասարյանի հարցին, թե ինչ էր թափված ճանապարհին, Տիգրան Պետրոսյանը հայտնեց, որ  անձամբ չի տեսել, բայց լսել է, որ հեղուկ է եղել: