Փաստ ինֆո

6-ամսական երեխային աշխատանքային շահագործման հանձնելու գործով այսօր դատարան էր հրավիրվել այն կիսանկուղի տերը, որտեղ վարձակալական հիմունքներով բնակվում են ամբաստանյալները` երեխայի մայրը ու այն կինը, ով երեխային իր հետ տարել է մուրացկանության:

Վկա Անահիտ Ասատրյանը նշեց, որ շահագործման ենթարկված փոքրիկ Էրիկին շատ է սիրում և ցանկանում է, որ նա իր ծնողի կողքին լինի:

Ամբաստանյալ Լուսիկը` իր տղայի հետ, և Ասատուրը, ով գործով մյուս ամբաստանյալ Լուսինեի եղբայրն է, շուրջ 3 տարի վարձակալական հիմունքներով բնակվում են վկայի «տանը», իսկ ամբաստանյալ Լուսինեն նրանց միացել է ավելի ուշ:

Փոքրիկ սենյակի վարձակալության օրավճարի վերաբերյալ վկան պնդեց, որ ամբաստանյալները վճարել են ընդամենը 3000 ՀՀ դրամ գումար, ապա հավելեց, որ այդ հարցերով զբաղվել է ամուսինը:

Պաշտպանական կողմի հարցադրումներից պարզվեց, որ երբ ամբաստանյալ Լուսինեն ևս բնակություն է հաստատել այդ սենյակում` մյուսների հետ, վարձի գումարը 1000 դրամով ավելացել է:

Վկան հայտնեց, թե ամբաստանյալներն ամեն օր, առավոտյան փոքրիկ Էրիկի հետ տանից դուրս են եկել եւ միայն երեկոյան վերադարձել, սակայն նշեց, թե չի իմացել, թե ուր են գնում և ինչով զբաղվում:

Ըստ վկայի՝ երբ տեղեկացել է Լուսիկի և Լուսինեի զբաղմունքի մասին, իրեն «վատ է զգացել», ավելին` բարկացել է Լուսիկի վրա, որ փոքր երեխային տվել է` այդ ճանապարհով գումար վաստակի:

Այն հարցին, թե ամբաստանյալներն ինչով են գումար վաստակել` այդ վարձակալության գումարը վճարելու համար, վկա նշեց, թե համոզված է եղել, որ Ասատուրն է գումար վաստակել՝ «Սիլաչիի» տարածքում որոշ ծառայություններ մատուցելով, «եղել են դեպքեր, որ նրան անգամ ուտելիքներ են տվել մարդիկ»:

Վկան նաև հայտնեց, որ ամբաստանյալ Լուսինեին տեսել է ավտոկայանի անցման տակ գումար մուրալիս, սակայն պնդեց, թե նրա հետ երեխան չի եղել:

Վկան՝ կիսանկուղային պայմաններում բնակվող և գումար մուրացող ամբաստանյալների սոցիալական պայմանները նորմալ համարեց` ասելով, թե մայրը փոքրիկին լավ էր խնամում, իսկ ինքն էլ օգնել է՝ որքան կարողացել է:

Ներկայումս փոքրիկ Էրիկը հաճախում է մանկապարտեզ:

Հաջորդ դատական նիստը տեղի կունենա սեպտեմբերի 4-ին: